ငလျင်ကြီးလှုပ်ခတ်ပြီးနောက်ပိုင်း ကလေးများအတွက် မျှော်လင့်ချက်ပြန်လည်တည်ဆောက်ပေးခြင်း

မြန်မာနိုင်ငံတဝန်း စာသင်ကျောင်းများစတင်ဖွင့်လှစ်ချိန်မှာ ငလျင်ဘေးဒဏ်သင့်ဒေသတွေက ကျောင်းသူကျောင်းသားတွေအနေနဲ့ ကျောင်းပြန်လည်တက်ရောက်သင်ယူနိုင်ဖို့ ရုန်းကန်နေကြရပါတယ်။ မတ်လ ၂၈ ရက်က လှုပ်ခတ်ခဲ့တဲ့ အင်အား ၇. ၇ အဆင့်ရှိ ငလျင်ဟာ ရာစုနှစ်တစ်ခုအတွင်း အဆိုးရွားဆုံးငလျင်ဖြစ်ပြီး ကျောင်းပေါင်း ၂၅၀၀ ကျော် ပျက်စီးခဲ့ရသလို ထောင်နဲ့ချီတဲ့ မိသားစုတွေလည်း ဘေးလွတ်ရာ ရွှေ့ပြောင်းခဲ့ကြရပါတယ်။

ဒါပေမဲ့ အပျက်အစီးတွေကြားက မြန်မာပြည်သူတွေရဲ့ ခံနိုင်စွမ်းရည်တွေ တွေ့မြင်နိုင်ပါတယ်။ ကလေးတွေက စာသင်နှစ်သစ်အတွက် အဆင်သင့်ပြင်နေကြသလို ဘုန်းတော်ကြီးကျောင်းတွေမှာ ယာယီသင်ကြားရေးနေရာတွေ၊ ယာယီတဲတွေ၊ မိုးကာဖျင်တွေခင်းပြီး ပြန်လည်သင်ကြားနိုင်အောင် ပြင်ဆင်နေကြပါတယ်။

"ဘယ်လိုအခြေအနေပဲဖြစ်ဖြစ် ကျွန်တော်တို့ စာဆက်သင်ကြရပါမယ်။”

📍အင်းဝမြို့ ၊ မန္တလေး

ပြိုကျနေသော စာသင်ခန်းများရှေ့တွင် ရပ်နေသည့် အသက် ၆၂နှစ်အရွယ် ဆရာ ဦးအောင်ဆန်းသည် အမိုးအကာမရှိဘဲ ခုံတစ်လုံးချ၍ ကျောင်းသားများကို ကျောင်းအပ်လက်ခံခဲ့ရပါတယ်။ 

"စာသင်ခန်းနှစ်ခန်းနဲ့ ပင်မဆောင်ကြီး ပြိုသွားတယ်။ ဒါပေမဲ့ အခု ကျောင်းအပ်လက်ခံထားတဲ့ ကျောင်းသားက ၉၀၀ လောက်ရှိနေပြီ။ မိဘတွေကဘယ်လောက်ပဲ အခက်အခဲရှိရှိ ကလေးတွေ စာသင်ဖို့ကို ဦးစားပေးကြတယ်။ ကျွန်တော်တို့ ယာယီစာသင်ဆောင်တွေ ဆောက်ထားပေမယ့် မလုံလောက်သေးဘူး။ ကျွန်တော်တို့ အကူအညီတွေလိုတယ် - ယာယီအဆောင်တွေရော၊ စာသင်ခန်းတွေရော အားလုံးပဲ။ ကလေးတွေ ပြန်ပြီးသင်ယူနိုင်အောင် ကျွန်တော်တို့ မဖြစ်မနေလုပ်ပေးဖို့လိုပါတယ်။"

ဦးအောင်ဆန်း

"ကလေးတွေက စာသင်ချင်တယ်၊ ပြီးတော့ လုံခြုံတယ်ဆိုတဲ့ခံစားချက်ကို ရချင်လို့ ဒီကိုလာကြတာ။"

📍မန္တလေးမြို့ ၊ ဘုန်းတော်ကြီးသင်စာသင်ကျောင်းတစ်ကျောင်း

ကျောင်းဝိုင်းထဲမှာ ရှားရှားပါးပါး တိတ်ဆိတ်ငြိမ်းချမ်းတဲ့ခံစားချက်တစ်ခုကို ဒေါ်မြတ်မွန် ခံစားမိပါတယ်။

“ကျောင်းသား ၈၀၀၀ ကျော် ကျောင်းအပ်ထားပြီးပါပြီ။ အများစုက လားရှိုး၊ သီပေါ၊ ပင်လောင်းနဲ့ စစ်ကိုင်းတိုင်းစတဲ့ ပဋိပက္ခဖြစ်နေတဲ့ ဒေသတွေကနေ လာကြတယ်။ ကျွန်မတို့ကျောင်းက ကြီးကြီးမားမားထိခိုက်မှုမရှိတော့ ကျောင်းအပ်တဲ့မိသားစုတွေ ပိုများလာတယ်။ ယူနီဆက်က ပံ့ပိုးတဲ့ ကလေးတွေအတွက် အပန်းဖြေကစားစရာလေးတွေ ကျွန်မတို့ကျောင်းက ရထားပါတယ်။ ဒါပေမဲ့လည်း ကျွန်မတို့ နောက်ထပ် အကူအညီတွေအများကြီး လိုနေပါသေးတယ်။

ဆုံးရှုံးမှုကိုသာ သိလိုက်ရတဲ့ကလေးတွေအတွက် သင်ယူလေ့လာရေးဆိုတာ ပုံမှန်ဖြစ်ပြီး အားကိုးရာဆိုတဲ့ ခံစားချက်ကို ရစေပါတယ်။

© UNICEF Myanmar/2025/Minzayar Oo

"ပဋိပက္ခတွေဖြစ်လို့ ကျွန်မတို့ ရွာကနေ ထွက်ပြေးလာခဲ့တယ်။ အခုကျတော့ ငလျင်လှုပ်တာနဲ့ ကြုံတာပဲ။"

📍ဘုန်းတော်ကြီးသင် စာသင်ကျောင်းတစ်ကျောင်း၊ စစ်ကိုင်း

ဘုန်းတော်ကြီးကျောင်း လှေကားထစ်မှာထိုင်ရင်း မနီလာတစ်ယောက် သူ့သမီးလေးရဲ့ ကျောင်းလွယ်အိတ်အသစ်လေးကို လက်ထဲပွေ့ထားပါတယ်။

"လွန်ခဲ့တဲ့နှစ်နှစ်က တိုက်ပွဲတွေကြောင့် ကျွန်မတို့အိမ်ဆုံးရှုံးခဲ့ရတယ်။ နောက်တော့ ငလျင်ကြောင့် ဒီမြို့ကြီး ပျက်စီးခဲ့တယ်။ ဒီလိုတွေကြုံနေရပေမယ့်လည်း ကျွန်မကလေးတွေအားလုံးကို စာသင်စေချင်တယ်။ ကလေးတွေက ဉာဏ်ကောင်းပြီး ကြိုးစားကြတယ်။ ကျွန်မတို့က စာအုပ်တွေ၊ကစားစရာတွေနဲ့ စာသင်ဖို့နေရာတွေရောပေါ့၊ ပံ့ပိုးပေးတာအားလုံးအတွက် သိပ်ကျေးဇူးတင်ပါတယ်။ ကလေးတွေကို ဆက်ပြီး စာသင်ပေးချင်တယ်။ ဒါမှ သူတို့အတွက် ပိုပြီးတောက်ပတဲ့အနာဂတ်ကို မျှော်မှန်းနိုင်မှာ။"

© UNICEF Myanmar/2025/Minzayar Oo

"ကျွန်တော်တို့မှာ စာသင်ခန်းတောင်မရှိသေးဘူး - ဒါပေမဲ့ လိုအပ်ရင် ကျွန်တော်တို့ နေရောညပါ သင်မှာပါ။

📍ဘုန်းတော်ကြီးသင်စာသင်ကျောင်းတစ်ကျောင်း၊ စစ်ကိုင်း

ဦးဇော်က ပြိုကျပျက်စီးသွားသော ငါးထပ်ကျောင်းဆောင်ကြီးတစ်ခုရှေ့ကနေ ဖြတ်လျှောက်လာပြီး အခုလိုပြောပြပါတယ်။

"ဒီမှာသေဆုံးသူ ဆယ့်ခြောက်ယောက်ရှိခဲ့တယ် - ကျောင်းသားတွေ၊ ဆရာတွေနဲ့ စစ်ဘေးရှောင်မိသားစုတွေ ပါတယ်။ ကျွန်တော်တို့မှာ စာသင်ခန်းတွေမရှိတော့ဘူး။ ဒါပေမဲ့ ယူနီဆက်က ယာယီစာသင်ဆောင်နဲ့ အမိုးရွက်တွေ ပံ့ပိုးပေးထားတယ်။ ဇွန်လလယ်လောက် ကျွန်တော်တို့ ကျောင်းပြန်ဖွင့်ဖြစ်မယ်လို့ မှန်းထားပါတယ်။ လိုအပ်လာရင် ကျွန်တော်တို့ နှစ်ချိန်ကျောင်းသင်မယ်။ ကလေးတွေ နောက်ကျန်နေခဲ့လို့မဖြစ်ဘူး။"

© UNICEF Myanmar/2025/Minzayar Oo

သင်ကြားရေးမျှသာမဟုတ်ဘဲ အသက်သွေးကြောတစ်ခုလည်းဖြစ်သည်

ပဋိပက္ခတွေ၊ နေရပ်စွန့်ခွာတိမ်းရှောင်ရမှုတွေ၊ ဆင်းရဲနွမ်းပါးမှုတွေအပြင် အင်အားပြင်းငလျင်လှုပ်ခတ်မှုကြောင့် ပညာသင်ယူဖို့ ပိုပြီးခက်ခဲလာခဲ့ပါတယ်။ ဒါပေမဲ့ ခိုင်မာတဲ့စိတ်ဓာတ်နဲ့ မိတ်ဖက်အဖွဲ့အစည်းတွေရဲ့ ပံ့ပိုးမှုတွေကြောင့် မိသားစုတွေဟာ ဆုံးရှုံးခဲ့ရတဲ့အရာတွေကို ပြန်ပြီးရယူနိုင်အောင်အောင် ကြိုးစားနေကြပါတယ်။

“သင်ယူတယ်ဆိုတာ ပညာရေးအတွက်တင်မကဘဲ အကာအကွယ်၊ သက်ဆိုင်မှု၊ ပြန်လည်ထူထောင်ရေးစတာတွေအတွက်လည်း ဖြစ်ပါတယ်။"

ယူနီဆက်က ငလျင်ဘေးသင့်ဒေသတွေက ကလေးတိုင်း လုံခြုံမှုရှိရှိ မနှောင့်နှေးဘဲ ပညာသင်ကြားနိုင်အောင် ပံ့ပိုးပေးဖို့ ကတိပြုလုပ်ဆောင်နေပါတယ်။ ဒါပေမဲ့ လိုအပ်ချက်တွေ အများကြီးရှိနေပါသေးတယ်။ ပံ့ပိုးမှုတွေကို အရှိန်မြှင့်လုပ်ဆောင်နိုင်ဖို့နဲ့ မျိုးဆက်တစ်ခု နောက်ကျန်မနေခဲ့အောင် ကာကွယ်ဖို့အတွက် ပိုပြီးပြောင်းလွယ်ပြင်လွယ်ရှိတဲ့ ရန်ပုံငွေကို အရေးတကြီး လိုအပ်နေပါတယ်။

ဤဓာတ်ပုံဇာတ်ကြောင်းရှိ အမည်များနှင့် တည်နေရာများကို ပါဝင်သူတစ်ဦးချင်းစီ၏ ကိုယ်ရေးလုံခြုံမှုနှင့် ဘေးကင်းလုံခြုံမှုကို ကာကွယ်ရန် ပြောင်းလဲထားပါသည်။

*ဤဆောင်းပါးကို UNICEF Myanmar ဝက်ဘ်ဆိုက်ဒ် တွင် မူရင်းရေးသားထုတ်ဝေထားပါသည်။