ရှင်းလင်းချက်- ကလေးသူငယ်အခွင့်အရေးများဆိုင်ရာ ကုလသမဂ္ဂ သဘောတူစာချုပ်ဆိုသည်မှာ အဘယ်နည်း။ ၎င်းက အဘယ်ကြောင့် အရေးပါပါသနည်း။

ကလေးသူငယ်အခွင့်အရေးများဆိုင်ရာ ကုလသမဂ္ဂသဘောတူစာချုပ်ဆိုသည်မှာ အဘယ်နည်း။

၁၉၈၉ ခုနှစ်တွင် ထူးထူးခြားခြား အပြာင်းအလဲတစ်ခု ဖြစ်ပေါ်ခဲ့ပါသည်။ ပြောင်းလဲနေသည့် ကမ္ဘာ့ နောက်ခံအကြောင်းအရာများအတွက် ကြိုတင်ပြင်ဆင်သည့်အနေဖြင့် ကမ္ဘာ့ခေါင်းဆောင်များ စုပေါင်းပြီး ကမ္ဘာ့ကလေးသူငယ်များအတွက် သမိုင်းဝင် ကတိကဝတ်တစ်ခုကို ချမှတ်နိုင်ခဲ့ကြပါသည်။ ကလေးသူငယ် အခွင့်အရေးများဆိုင်ရာ ကုလသမဂ္ဂ သဘောတူညီချက် – အပြည်ပြည်ဆိုင်ရာ ဥပဒေမူဘောင်ကို ကျင့်သုံးခြင်းအားဖြင့် ကလေးသူငယ်တိုင်းအား ၎င်းတို့၏ အခွင့်အရေးများကို ကာကွယ်စောင့်ရှောက်ပေးရန်နှင့် ဖြည့်ဆည်းပေးရန် ကတိပြုခဲ့ကြသည်။

ဤစာချုပ်တွင် ပါရှိသည့် လေးနက်သော အချက်တစ်ခုမှာ - ကလေးများသည် ၎င်းတို့၏ မိဘများနှင့်သာ သက်ဆိုင်ပြီး ၎င်းတို့အတွက် ဆုံးဖြတ်ချက်များကို ချမှတ်ပေးရမည် မဟုတ်ဘဲ လေ့ကျင့်သင်တန်းတက်နေသည့် အရွယ်ရောက်သူများဖြစ်သည်ဟူသည့် အ‌ယူအဆဖြစ်သည်။ ပို၍အတိအကျဆိုရလျှင် ကလေးသူငယ်များသည် လူသားများဖြစ်ကြပြီး ၎င်းတို့ ကိုယ်ပိုင်အခွင့်အရေးရှိသူများဖြစ်သည်။ ကလေးဘဝသည် လူကြီးဘဝနှင့် ခွဲခြားထားပြီး အသက် ၁၈ နှစ်အထိဖြစ်သည်ဟူ၍ သဘောတူစာချုပ်က ဆိုထားသည်။ ၎င်းသည် ကလေးများအား ကြီးထွားရန်၊ သင်ယူရန် ၊ ကစားရန် ၊ ဖွံ့ဖြိုးရန်နှင့် ဂုဏ်သိက္ခာရှိစွာ ဖွံ့ဖြိုးတိုးတက်ရန် ခွင့်ပြုရမည့် အထူး၊ အကာအကွယ်ပေးထားသော အချိန်ဖြစ်သည်။

သဘောတူစာချုပ်တွင် လက်မှတ်ထိုးထားသည့် နိုင်ငံများသည် ကလေးသူငယ်များအားလုံး - မည်သည့်ပုံစံဖြင့်မဆို ခွဲခြားဆက်ဆံခြင်းမပြုဘဲ – အထူးကာကွယ်စောင့်ရှောက်ရေး အစီအမံများနှင့် ပံ့ပိုးမှုများမှ အကျိုးကျေးဇူးများ ရရှိစေရန် ၊ ပညာရေးနှင့် ကျန်းမာရေးစောင့်ရှောက်မှုကဲ့သို့သော ဝန်ဆောင်မှုများ ရရှိစေရန် ၊ ၎င်းတို့၏ ကိုယ်ရည်ကိုယ်သွေးများ၊ စွမ်းရည်များနှင့် အလားအလာများ အပြည့်အဝ ဖွံ့ဖြိုးတိုးတက်နိုင်စေရန် ၊ ပျော်ရွှင်မှု၊ ချစ်ခြင်းမေတ္တာနှင့် နားလည်မှုရှိသော ပတ်ဝန်းကျင်တွင် ကြီးပြင်းနိုင်စေရန်နှင့် ၎င်းတို့၏ အခွင့်အရေးများကို လက်လှမ်းမီပြီး တက်တက်ကြွကြွ ရရှိစေရန်အတွက် သေချာအောင်ဆောင်ရွက်ရမည်ဟု အပြည်ပြည်ဆိုင်ရာ ဥပဒေတွင် ပြဌာန်းထားသည်။

ထိုသဘောတူစာချုပ်သည် သမိုင်းတွင် အကျယ်ပြန့်ဆုံး အတည်ပြုလက်မှတ်ရေးထိုးထားသည့် လူ့အခွင့်အရေး သဘောတူစာချုပ် ဖြစ်လာခဲ့ပြီး ကလေးသူငယ်များ၏ ဘဝများကို ပြောင်းလဲနိုင်ရန် အထောက်အကူပြုပါသည်။

ဤသဘောတူစာချုပ်က မည်သည့်အောင်မြင်မှုများ ရရှိခဲ့သနည်း။

ထိုသဘောတူစာချုပ်သည် သမိုင်းတွင် အကျယ်ပြန့်ဆုံး အတည်ပြုလက်မှတ်ရေးထားသည့် လူ့အခွင့်အရေး သဘောတူစာချုပ်ဖြစ်သည်။ ၎င်းသည် အစိုးရများအား ပိုမိုများပြားသော ကလေးသူငယ်များ ရှင်သန်ဖွံ့ဖြိုးရန် လိုအပ်သော ကျန်းမာရေးစောင့်ရှောက်မှုနှင့် အာဟာရ ရရှိစေရန်နှင့် ကလေးများအား အကြမ်းဖက်မှုနှင့် ခေါင်းပုံဖြတ်ခံရခြင်းမှ ကာကွယ်ပေးမည့် ပိုမိုခိုင်မာသော အကာအကွယ်များ ရှိစေရန်အလို့ငှာ ဥပဒေများနှင့် မူဝါဒများကို ပြောင်းလဲရန်နှင့် ရင်းနှီးမြှုပ်နှံမှုများ ပြုလုပ်ရန် လှုံ့ဆော်ပေးခဲ့ပါသည်။ ၎င်းသည် ပိုမိုများပြားသော ကလေးများအား ၎င်းတို့၏ အသံများကို ကြားနိုင်စေရန်နှင့် ၎င်းတို့၏ လူမှုအသိုင်းအဝိုင်းများတွင် ပါဝင်နိုင်မည့် အခွင့်အလမ်းများလည်း ပိုမိုရရှိစေခဲ့သည်။

ဤသို့တိုးတက်မှုရှိသည့်တိုင် သဘောတူစာချုပ်ကို အပြည့်အဝ အကောင်အထည်ဖော်ခြင်း သို့မဟုတ် ကျယ်ကျယ်ပြန့်ပြန့် သိရှိနားလည်ခြင်း မရှိသေးပါ။ သန်းပေါင်းများစွာသော ကလေးများသည် လုံလောက်သော ကျန်းမာရေးစောင့်ရှောက်မှု၊ အာဟာရ ၊ ပညာရေးနှင့် အကြမ်းဖက်မှုမှ အကာအကွယ် မရရှိပဲ ၎င်းတို့၏ အခွင့်အရေး ချိုးဖောက်မှုများ အကျိုးရလဒ်ကို ဆက်လက်ခံစားနေရသည် ။ ကလေးများသည် ကျောင်းထွက်ရခြင်း ၊ အန္တရာယ်ရှိသောအလုပ်များလုပ်ရခြင်း ၊ အိမ်ထောင်ပြုခြင်း ၊ စစ်ပွဲများအတွင်းပါဝင်တိုက်ခိုက်ခြင်း သို့မဟုတ် အရွယ်ရောက်ပြီးသူ အကျဉ်းထောင်များအတွင်း ချုပ်နှောင်ခြင်းခံ အစရှိသည်ဖြင့် ကလေးများဘဝသည် ဆက်လက်ဖြတ်တောက်ခံနေကြရဆဲဖြစ်သည်။

ထို့ပြင် ဒစ်ဂျစ်တယ်နည်းပညာ၊ ရာသီဥတုပြောင်းလဲမှု ၊ ကာလရှည် ပဋိပက္ခနှင့် အစုလိုက်အပြုံလိုက် ရွှေ့ပြောင်းမှု အစရှိသည့် ကမ္ဘာလုံးဆိုင်ရာ အပြောင်းအလဲများသည် ကလေးသူငယ်ဘဝကို လုံးဝပြောင်းလဲသွားစေပါသည်။ ယနေ့ခေတ်ကလေးများသည် ၎င်းတို့၏ အခွင့်အရေးများနှင့်ပတ်သက်၍ ခြိမ်းခြောက်မှုအသစ်များနှင့် ရင်ဆိုင်နေရသော်လည်း ၎င်းတို့၏ အခွင့်အရေးများကို အကောင်အထည်ဖော်နိုင်မည့် အခွင့်အလမ်းအသစ်များလည်း ရှိနေပါသည်။

ကလေးသူငယ်အခွင့်အရေးများဆိုင်ရာ ကုလသမဂ္ဂသဘောတူစာချုပ်တွင် ပါဝင်သင့်သည်များနှင့်ပတ်သက်၍ မည်သို့ဆုံးဖြတ်ခဲ့သနည်း။

ကလေးသူငယ်အခွင့်အရေးဆိုင်ရာ သဘောတူစာချုပ်ပါ စံနှုန်းများကို အစိုးရများ၊ အစိုးရမဟုတ်သော အဖွဲ့အစည်းများ၊ လူ့အခွင့်အရေးဆိုင်ရာ အကျိုးဆောင်များ၊ ရှေ့နေများ ၊ ကျန်းမာရေးဆိုင်ရာ အထူးကျွမ်းကျင်သူများ ၊ လူမှုဝန်ထမ်းများ ၊ ပညာရှင်များ၊ ကလေးသူငယ် ဖွံ့ဖြိုးတိုးတက်ရေး ကျွမ်းကျင်သူများနှင့် ဘာသာရေးခေါင်းဆောင်များက ၁၀ နှစ်တာကာလအတွင်း ညှိနှိုင်းခဲ့ကြသည်။

အဆိုပါရလဒ်သည် ကလေးတစ်ဦး၏ အကာအကွယ်နှင့် သဟဇာတဖြစ်သော ဖွံ့ဖြိုးတိုးတက်မှုအတွက် အစဉ်အလာနှင့် ယဉ်ကျေးမှုတန်ဖိုးများ၏ အရေးပါမှုကို ထည့်သွင်းစဉ်းစားထားသည့် သဘောတူညီချက်စာတမ်းတစ်ခုဖြစ်သည်။ ၎င်းသည် ကမ္ဘာ၏ အဓိက တရားရေးစနစ်များကို ထင်ဟပ်စေပြီး ဖွံ့ဖြိုးဆဲနိုင်ငံများ၏ တိကျသော လိုအပ်ချက်များကို အသိအမှတ်ပြုသည်။

ကလေးသူငယ်အခွင့်အရေးများဆိုင်ရာ ကုလသမဂ္ဂသဘောတူစာချုပ်က ကလေးတစ်ဦးကို မည်သို့ အဓိပ္ပါယ်ဖွင့်ဆိုသနည်း။

အဆိုပါသဘောတူစာချုပ်အရ သက်ဆိုင်ရာဥပဒေများက အရွယ်ရောက်သည့်အသက်ကို ထို့ထက်ငယ်သည့် အသက်အရွယ်တစ်ခုအား အသိအမှတ်ပြုထားခြင်းမဟုတ်လျှင် အသက် ၁၈နှစ်အောက်ရှိသူကို "ကလေး" အဖြစ် သတ်မှတ်သည်။ အချို့ကိစ္စရပ်များတွင် နိုင်ငံများသည် အလုပ်အကိုင်တစ်ခု စတင်လုပ်ကိုင်ရန်နှင့် မတက်မနေရ ပညာရေး သင်ယူပြီးမြောက်ရန် အသက်အရွယ်ကဲ့သို့သော အနိမ့်ဆုံးအသက်အရွယ်များကို သတ်မှတ်ပေးရန် တာဝန်ရှိသည်။ သို့သော် အခြားကိစ္စရပ်များတွင် သဘောတူစာချုပ်သည် အသက် ၁၈ နှစ်အောက်ရှိသူများအား လွတ်ရက်မရှိ တစ်သက်တစ်ကျွန်းထောင်ဒဏ်ချမှတ်ခြင်း သို့မဟုတ် သေဒဏ်ချမှတ်ခြင်းကို ရှင်းလင်းပြတ်သားစွာ တားမြစ်ထားသည်။

သဘောတူစာချုပ်၏ လမ်းညွှန်အခြေခံမူများမှာ အဘယ်နည်း။

ညီလာခံ၏ လမ်းညွှန်အခြေခံမူများမှာ- ခွဲခြားဆက်ဆံမှုမပြုခြင်း ၊ ကလေးသူငယ်များနှင့်ပတ်သက်သည့် လုပ်ဆောင်ချက်များအားလုံးတွင် ကလေး၏ အကောင်းဆုံးအကျိုးစီးပွားကို အဓိကထည့်သွင်းစဉ်းစားခြင်း၊ ကလေး၏ မွေးရာပါအသက်ရှင်ခွင့်နှင့် ကလေး၏ ရှင်သန်မှုနှင့် ဖွံ့ဖြိုးတိုးတက်မှုကို အများဆုံးအတိုင်းအတာအထိ အတတ်နိုင်ဆုံး သေချာစေရန်မှာ စာချုပ်ပါနိုင်ငံများ၏ တာဝန်ဖြစ်ခြင်း၊ နှင့် ကလေးသူငယ်အပေါ် သက်ရောက်မှုရှိသည့် ကိစ္စရပ်များအားလုံးတွင် ကလေး၏ အမြင်များကို လွတ်လပ်စွာ ထုတ်ဖော်ပြောဆိုခွင့်ပေးခြင်း၊ ထိုအမြင်များကို သင့်လျော်သော အလေးထားမှုပေးခြင်းသည် ကလေး၏ အခွင့်အရေးဖြစ်ခြင်း စသည်တို့ဖြစ်သည်။

ကလေးသူငယ်အခွင့်အရေးများဆိုင်ရာ ကုလသမဂ္ဂသဘောတူစာချုပ်တွင် ကလေးသူငယ်နှင့်စပ်လျဉ်းသည့် အမြင်ဆိုသည်မှာ အဘယ်နည်း။

ဤသဘောတူစာချုပ်သည် နိုင်ငံအားလုံး လိုက်နာရမည့် ကမ္ဘာလုံးဆိုင်ရာ စံချိန်စံညွှန်းအစုတစ်ခုကို ဖော်ပြသည်။ ယင်းသည် ကလေးသူငယ်နှင့် စပ်လျဉ်းသည့် အမြင်သစ်တစ်ခုကို ထင်ဟပ်စေပါသည်။ ကလေးသူငယ်များသည် ၎င်းတို့မိဘများ၏ ပိုင်ဆိုင်မှုတစ်ခုမဟုတ်သကဲ့သို့ လှူဒါန်းမှုများဖြင့် ကူကယ်ရာမဲ့နေသော အရာများလည်း မဟုတ်ကြပါ။ ၎င်းတို့သည် လူသားများဖြစ်ကြပြီး ၎င်းတို့ ကိုယ်ပိုင်အခွင့်အရေးရှိသူများဖြစ်သည်။ သဘောတူစာချုပ်တွင် ကလေးတစ်ဦးအား ကလေး၏ အသက်အရွယ်၊ ဖွံ့ဖြိုးတိုးတက်မှုအဆင့်နှင့် သင့်လျော်သော အခွင့်အရေးများနှင့် တာဝန်ဝတ္တရားများရှိသည့် လူတစ်ဦးအဖြစ်လည်းကောင်း၊ မိသားစုနှင့် အသိုင်းအဝိုင်း၏ အဖွဲ့ဝင်တစ်ဦးအဖြစ်လည်းကောင်း ရှုမြင်ကြောင်း ဖော်ပြထားသည်။ ဤနည်းဖြင့် ကလေးများ၏ အခွင့်အရေးများကို အသိအမှတ်ပြုခြင်းသည် ကလေးဘက်စုံ ဖွံ့ဖြိုးရေးအပေါ် ခိုင်မာစွာအာရုံစိုက်စေသည်။

ကလေးသူငယ်အခွင့်အရေးများဆိုင်ရာ ကုလသမဂ္ဂသဘောတူစာချုပ်သည် မည်သို့ထူးခြားမှုရှိသနည်း။

သဘောတူစာချုပ်-

• ကမ္ဘာပေါ်ရှိ နိုင်ငံအားလုံးနီးပါးတွင် ကျင့်သုံးနေသည့် - သမိုင်းတွင် အကျယ်ပြန့်ဆုံး အတည်ပြုလက်မှတ်ရေးထိုးထားသည့် လူ့အခွင့်အရေး သဘောတူစာချုပ်ဖြစ်ပြီး ကလေးသူငယ် အခွင့်အရေးများ အကောင်အထည်ပေါ်ရေးအတွက် ဘုံကျင့်ဝတ်နှင့် ဥပဒေရေးရာ မူဘောင်ကို ပံ့ပိုးပေးထားပါသည်။
• ကလေးသူငယ်အခွင့်အရေးများ အကောင်အထည်ပေါ်ရေးနှင့် ကလေးသူငယ်များ၏ အခြေအနေတိုးတက်မှုကို စောင့်ကြည့်လေ့လာရန်အတွက် ပထမဆုံးအကြိမ် တရားဝင်ကတိကဝတ်ပြုခြင်းဖြစ်သည်။
• ကလေးသူငယ် အခွင့်အရေးများကို ရွေးချယ်မှုတစ်ခု၊ ကလေးသူငယ်များအပေါ် ထောက်ခံမှု သို့မဟုတ် ကြင်နာမှုဆိုင်ရာ ကိစ္စရပ်တစ်ခု သို့မဟုတ် ပရဟိတ ဖော်ပြချက်တစ်ခုအဖြစ် ယူဆ၍မရတော့ကြောင်း ဖော်ပြသည်။ ကလေးသူငယ်များ၏ အခွင့်အရေးများသည် ကျွန်ုပ်တို့အားလုံး လေးစားလိုက်နာရမည့် ဝတ္တရားများနှင့် တာဝန်များကို ဖန်တီးပေးပါသည်။
• အစိုးရမဟုတ်သော အဖွဲ့အစည်းများမှ အသိအမှတ်ပြုခြင်းခံရသည်။
• ၎င်းသည် NGO များနှင့် ကုလသမဂ္ဂစနစ်အတွင်းရှိ အဖွဲ့အစည်းများအပါအဝင် ကလေးများနှင့်အတူ အလုပ်လုပ်နေသည့် အဖွဲ့အစည်းများစွာအတွက် ရည်ညွှန်းချက်တစ်ခုဖြစ်သည်။
• အခွင့်အရေးအားလုံးသည် ကလေးတစ်ဦး၏ အပြည့်အဝဖွံ့ဖြိုးတိုးတက်မှုအတွက် ညီတူညီမျှ အရေးကြီးပြီး မရှိမဖြစ်လိုအပ်ကြောင်းနှင့် ကလေးတစ်ဦးချင်းစီတိုင်းသည် အရေးကြီးကြောင်း ထပ်လောင်းအတည်ပြုပါသည်။
• လူ့အခွင့်အရေးနှင့် ၎င်းနှင့်ဆက်စပ်သော ပွင့်လင်းမြင်သာမှုနှင့် အများပြည်သူဆိုင်ရာ စိစစ်မှုတန်ဖိုးများကို အကောင်အထည်ဖော်ရန်အတွက် နိုင်ငံတော်၏ တာဝန်ခံမှုအယူအဆကို ထပ်လောင်းအတည်ပြုပါသည်။
• ကလေးသူငယ်အခွင့်အရေးများ အကောင်အထည်ဖော်နိုင်ရန် ရည်ရွယ်သည့် အပြည်ပြည်ဆိုင်ရာ စည်းလုံးညီညွတ်ရေးစနစ်တစ်ခုကို အားပေးမြှင့်တင်ပေးသည်။ အလှူရှင်နိုင်ငံများအား သက်ဆိုင်ရာလိုအပ်ချက်များကို ဖော်ထုတ်သိရှိထားသည့်နေရာများတွင် အကူအညီများပေးရန် တောင်းဆိုအပ်ပါသည်၊ လက်ခံသည့်နိုင်ငံများအားလည်း ပြည်ပဖွံ့ဖြိုးတိုးတက်ရေးအကူအညီများကို အဆိုပါနေရာများသို့ ဦးတည်ပေးရန် တောင်းဆိုအပ်ပါသည်။
• ကလေးသူငယ်အခွင့်အရေးများကို မြှင့်တင်ရန်နှင့် ကာကွယ်ရန် လူ့အဖွဲ့အစည်း၊ လူမှုအသိုင်းအဝိုင်းများနှင့် မိသားစုများ၏ အခန်းကဏ္ဍကို မီးမောင်းထိုးပြပါသည်။

ကလေးသူငယ် အခွင့်အရေးများဆိုင်ရာ သဘောတူစာချုပ်ကို နိုင်ငံပေါင်းမည်မျှက လက်မှတ်ရေးထိုး အတည်ပြုထားပါသနည်း။

ကလေးသူငယ်အခွင့်အရေးဆိုင်ရာ သဘောတူစာချုပ်သည် သမိုင်းတွင် အလျင်မြန်ဆုံး အတည်ပြုလက်မှတ်ရေးထိုးထားသော လူ့အခွင့်အရေး သဘောတူစာချုပ်ဖြစ်ပါသည်။ သမိုင်းတွင် အခြားမည်သည့်လူ့အခွင့်အရေးစာချုပ်ထက်မဆို ပိုမိုသောနိုင်ငံများသည် သဘောတူစာချုပ်ကို အတည်ပြုလက်မှတ်ရေးထိုးထားသည့်– နိုင်ငံပေါင်း ၁၉၆ နိုင်ငံသည် သဘောတူစာချုပ်၏ အဖွဲ့ဝင်နိုင်ငံများ ဖြစ်လာသည်။ မြန်မာနိုင်ငံသည်လည်း ၁၉၉၁ ခုနှစ်တွင်လက်မှတ်ရေးထိုးပြီး အဖွဲ့၀င်နိုင်ငံဖြစ်လာပါသည်။ အမေရိကန်ပြည်ထောင်စုတစ်ခုတည်းကသာ သဘောတူညီစာချုပ်ကို လက်မှတ်ရေးထိုးခြင်းမရှိပါ။ သို့သော်လည်း သဘောတူစာချုပ်ကို လက်မှတ်ရေးထိုးခြင်းအားဖြင့် အမေရိကန်ပြည်ထောင်စုက ၎င်း၏ အတည်ပြုလက်မှတ်ရေးထိုးရန် ဆန္ဒကို အရိပ်အမြွက်ပြခဲ့သော်လည်း ယခုအချိန်အထိ လက်မှတ်ရေးထိုးခြင်း မရှိသေးပါ။

သဘောတူစာချုပ် အကောင်အထည်ဖော်မှုအပေါ် နိုင်ငံတကာအသိုင်းအဝိုင်းက မည်သို့ စောင့်ကြည့်လေ့လာပြီး တိုးတက်မှုကို ပံ့ပိုးပေးသနည်း။

သဘောတူစာချုပ် အကောင်အထည်ဖော်မှုကို စောင့်ကြည့်လေ့လာရန် လွတ်လပ်သော ပညာရှင်များဖြင့် ရွေးချယ်ဖွဲ့စည်းထားသည့် ကလေးသူငယ်အခွင့်အရေးများဆိုင်ရာ ကော်မတီသည် သဘောတူစာချုပ်ကို အတည်ပြုလက်မှတ်ရေးထိုးထားသည့် အစိုးရများအနေဖြင့် ၎င်းတို့ နိုင်ငံများရှိ ကလေးသူငယ်အခွင့်အရေး အခြေအနေများနှင့် ပတ်သက်၍ ပုံမှန်အစီရင်ခံစာများ တင်ပြရန် လိုအပ်သည်။ ကော်မတီသည် ဤအစီရင်ခံစာများကို ပြန်လည်သုံးသပ်ပြီး နိုင်ငံများအားအကြံပြုချက်များပေးသည်။ လိုအပ်ပါက ကော်မတီသည် အခြားအစိုးရများထံမှ နိုင်ငံတကာအကူအညီနှင့် ယူနီဆက်ကဲ့သို့သော အဖွဲ့အစည်းများထံမှ နည်းပညာအကူအညီများကို တောင်းဆိုပါသည်။

ကလေးသူငယ် အခွင့်အရေးများဆိုင်ရာ သဘောတူစာချုပ်နှင့် ကလေးသူငယ် အခွင့်အရေးများဆိုင်ရာ ကော်မတီတို့က အစိုးရများအား မည်သည့်အဆင့်များ လုပ်ဆောင်ရန် တိုက်တွန်းပါသနည်း။

နိုင်ငံအစီရင်ခံစာများကို ပြန်လည်သုံးသပ်ခြင်းမှတစ်ဆင့် ကော်မတီသည် ကလေးများအတွက် နိုင်ငံအစီအစဉ်တစ်ခု ထားရှိခြင်း ၊ ကလေးများအတွက် ဘတ်ဂျက်မည်မျှသုံးစွဲသည်ကို စောင့်ကြည့်ခြင်း၊ ကလေးများ၏ ဘဝများနှင့်ပတ်သက်သည့် ယုံကြည်စိတ်ချရသော အချက်အလက်များကို အသုံးပြု၍ အစိုးရဌာနအသီးသီးတွင် ပုံမှန်သက်ရောက်မှုအကဲဖြတ်မှုများ ပြုလုပ်ခြင်းနှင့် ကလေးသူငယ်ဆိုင်ရာ လွတ်လပ်သော စုံစမ်းရေးအာဏာပိုင်အဖွဲ့တစ်ခု ထားရှိခြင်းတို့အပါအဝင် အစိုးရအဆင့်အားလုံးအား မူဝါဒချမှတ်ခြင်းနှင့် အကောင်အထည်ဖော်ခြင်းအတွက် လမ်းညွှန်အဖြစ် အသုံးပြုရန် တိုက်တွန်းပါသည်။

ကလေးသူငယ်အခွင့်အရေးများဆိုင်ရာ သဘောတူစာချုပ်သည် မည်သည့်နယ်ပယ်များတွင် ထိရောက်မှုအရှိဆုံးဖြစ်သနည်း။

သဘောတူစာချုပ်အတည်ပြုပြီးနောက် နှစ်ပေါင်း ၃၀ အတွင်း သန်းပေါင်းများစွာသော ကလေးသူငယ်များ၏ ဘဝများသည် သဘောတူစာချုပ်နှင့် ၎င်း၏ ရွေးချယ်နိုင်သော ညှိနှိုင်းချက်မှတ်တမ်းသုံးခုတွင် ပြဋ္ဌာန်းထားသည့် အခွင့်အရေးများနှင့် တာဝန်ဝတ္တရားများကို အဆင့်ဆင့် အကောင်အထည်ဖော်ခြင်းနှင့် ဖြည့်ဆည်းခြင်းတို့မှတစ်ဆင့် တိုးတက်ကောင်းမွန်လာခဲ့သည်။

သဘောတူစာချုပ်သည် ကမ္ဘာ့အစိတ်အပိုင်းအားလုံးတွင် အပြောင်းအလဲများကို လှုံ့ဆော်ပေးပြီး အောက်ပါတို့ ပါဝင်သည်-

• ကလေးသူငယ်အခွင့်အရေးအခြေခံမူများကို ဥပဒေတွင် ထည့်သွင်းခြင်း
• ကလေးသူငယ်အခွင့်အရေးများကို ကိုင်တွယ်ဖြေရှင်းရန် ဌာနတွင်းနှင့် စည်းကမ်းစုံထိန်းသိမ်းရေး အဖွဲ့အစည်းများ ဖွဲ့စည်းခြင်း
• ကလေးသူငယ်များအတွက် နိုင်ငံအစီအစဉ်များ ရေးဆွဲခြင်း
• ကလေးသူငယ်များအတွက် စုံစမ်းစစ်ဆေးရေး အရာရှိများ သို့မဟုတ် ကလေးသူငယ် အခွင့်အရေးများအတွက်‌ ကော်မရှင်နာများ ခန့်ထားခြင်း
• ကလေးသူငယ် အခွင့်အရေးများ အကောင်အထည်ဖော်ရန် ဘတ်ဂျက်ခွဲဝေသုံးစွဲမှုကို ပြန်လည်ဖွဲ့စည်းခြင်း
• ကလေးသူငယ် ရှင်သန်မှုနှင့် ဖွံ့ဖြိုးတိုးတက်မှုကို ဦးတည်သည့် ကြားဝင်ပံ့ပိုးမှုများ
• ကလေးသူငယ်များအကြား လူမှုစီးပွားမညီမျှမှုများအပါအဝင် ကလေးသူငယ်အခွင့်အရေးများရရှိရန် ခွဲခြားဆက်ဆံမှုနှင့် အခြားအတားအဆီးများကို ကိုင်တွယ်ဖြေရှင်းခြင်း
• ကလေးသူငယ်များအနေဖြင့် ၎င်းတို့၏ အမြင်များကို ထုတ်ဖော်ပြောဆိုရန်နှင့် နားထောင်ရန် အခွင့်အလမ်းများ ဖန်တီးပေးခြင်း
• ကလေးသူငယ်များအတွက် မိတ်ဖက်ပူးပေါင်းမှုများတိုးချဲ့ခြင်း
• ကလေးသူငယ်များအပေါ် အရေးယူဆောင်ရွက်မှုများ၏ သက်ရောက်မှုကို အကဲဖြတ်ခြင်း ။

ယူနီဆက်က ကလေးသူငယ်အခွင့်အရေးများဆိုင်ရာ သဘောတူစာချုပ်ကို မည်သို့အသုံးပြုပါသနည်း။

ယူနီဆက်သည် နေရာတိုင်းမှ ကလေးသူငယ်တိုင်း အထူးသဖြင့် အားနဲချို့တဲ့ဆုံးသူများ၏ အခွင့်အရေးများကို အကာအကွယ်ပေးရန် တာဝန်ပေးထားသော ကုလသမဂ္ဂအဖွဲ့အစည်းဖြစ်သည်။ ၎င်း၏ ကတိကသတ်ပြု ခံယူထားသည့်တာဝန်စာတမ်းတွင် ဖော်ပြထားသည့်အတိုင်း"ယူနီဆက်ကို ကုလသမဂ္ဂအထွေထွေညီလာခံက ကလေးသူငယ်များ၏ အခွင့်အရေးများကို ကာကွယ်ရန်၊ ၎င်းတို့၏ အခြေခံလိုအပ်ချက်များကို ဖြည့်ဆည်းရန်နှင့် ၎င်းတို့၏ အလားအလာများကို အပြည့်အဝ ဖန်တီးနိုင်မည့် အခွင့်အလမ်းများကို တိုးချဲ့ရန်တို့အတွက် စည်းရုံးဆောင်ရွက်ရန် တာဝန်ပေးအပ်ထားသည်။" ယူနီဆက်ကို ကလေးသူငယ် အခွင့်အရေးများဆိုင်ရာ သဘောတူစာချုပ်မှ လမ်းညွှန်ပေးပြီး ကလေးသူငယ်များအပေါ် ကျင့်ဝတ်ဆိုင်ရာ အခြေခံမူများနှင့် အပြုအမူဆိုင်ရာ နိုင်ငံတကာစံနှုန်းများအဖြစ် ကလေးသူငယ်အခွင့်အရေးများကို ထူထောင်ရန် ကြိုးပမ်းဆောင်ရွက်လျက်ရှိပါသည်။”

ယူနီဆက်သည် ကလေးသူငယ်အခွင့်အရေးများဆိုင်ရာ သဘောတူစာချုပ်တွင် ကလေးသူငယ်အခွင့်အရေးများနှင့်ပတ်သက်လာလျှင် အထူးကျွမ်းကျင်သော တစ်ခုတည်းသော အဖွဲ့အစည်းဖြစ် သတ်မှတ်ဖေါ့်ပြထားပြီး၊ ကလေးသူငယ်အခွင့်အရေးများဆိုင်ရာအကူအညီနှင့် အကြံဉာဏ်များပေးသည့် ရင်းမြစ်တစ်ခုအဖြစ်ပါ သည်။ သဘောတူစာချုပ်သည် ယူနီဆက်အား အကဲဖြတ်ခြင်းနှင့် ကိုင်တွယ်ဖြေရှင်းရမည့် နယ်ပယ်များနှင့် ပတ်သက်၍ လမ်းညွှန်မှုပေးပြီး ထိုနယ်ပယ်များရှိ တိုးတက်မှုများကို တိုင်းတာသည့် ကိရိယာတစ်ခုလည်း ဖြစ်သည်။ ယူနီဆက်သည် ကလေး၏ ရှင်သန်မှုနှင့် ဖွံ့ဖြိုးတိုးတက်မှုအပေါ် အာရုံစိုက်ခြင်းအပြင် ကလေးများအားလုံး၏ အခြေအနေကို ထည့်သွင်းစဉ်းစားရမည်၊ စီးပွားရေးနှင့် လူမှုပတ်ဝန်းကျင်ကို ခွဲခြမ်းစိတ်ဖြာရမည်၊ တုံ့ပြန်မှုအား ခိုင်မာစေရန် မိတ်ဖက်အဖွဲ့အစည်းများ ထူထောင်ရမည် (ကလေးများ ကိုယ်တိုင်ပါဝင်မှုအပါအဝင်) ၊ ခွဲခြားဆက်ဆံမှုမရှိခြင်းကို အခြေခံ၍ ကြားဝင်ပံ့ပိုးမှုများကို ထောက်ပံ့ပေးပြီး ကလေး၏ အကောင်းဆုံးအကျိုးစီးပွားအတွက် လုပ်ဆောင်ရမည်။