ကုလသမဂ္ဂအတွင်းရေးမှူးချုပ်၏ ပဋိပက္ခအတွင်း လိင်ပိုင်းဆိုင်ရာအကြမ်းဖက်မှု ပပျောက်ရေး နိုင်ငံတကာနေ့ သတင်းစကား

ဒီနှစ်ရဲ့ ပဋိပက္ခအတွင်း လိင်ပိုင်းဆိုင်ရာ အကြမ်းဖက်မှု ပပျောက်ရေး နိုင်ငံတကာနေ့မှာ ဒီလို ဆိုးရွားတဲ့ ရာဇဝတ်မှု ကျူးလွန်ခံရတဲ့ ကလေးသူငယ်တွေကို အဓိကထားလိုပါတယ်။

ကမ္ဘာအနှံ့မှာ ပဋိပက္ခတွေ ပိုပြင်းထန်လာတာနဲ့အမျှ၊ မတရားပြုကျင့်ခံရတာ၊ လိင်ကျွန်ပြုခံရတာ၊ အတင်းအကြပ်လက်ထပ်စေတာနဲ့ လူကုန်ကူးခံရတာတွေရဲ့ သားကောင်ဖြစ်နေရတဲ့ မိန်းကလေးတွေနဲ့ ယောက်ျားလေးတွေရဲ့ အရေအတွက်က တုန်လှုပ်စရာကောင်းလောက်အောင် များလာပါတယ်။

အများစုကတော့ သူတို့အိမ်တွေကို တိုက်ခိုက်ခံရချိန်၊ ဒါမှမဟုတ် အကြမ်းဖက်မှုမှ ထွက်ပြေးလာချိန်မှာ  လူမဆန်စွာ ပြုမူခံရတာဖြစ်ပါတယ်။ တချို့မှာတော့ ပြန်ပေးဆွဲခံရတာ၊ စစ်သားအဖြစ် အဓမ္မစုဆောင်းခံရတာ၊ ရက်စက်ယုတ်မာမှုတွေကို မျက်မြင်တွေ့ကြုံခိုင်းခံရတာ၊ ဒါမှမဟုတ် သူတို့ကိုယ်တိုင်တောင် လိင်ပိုင်းဆိုင်ရာ အကြမ်းဖက်မှုတွေ လုပ်လာအောင် ဖိအားပေးခံနေရတာတွေလည်း ရှိပါတယ်။

ကလေးသူငယ်တွေအပေါ် လိင်ပိုင်းဆိုင်ရာ အကြမ်းဖက်တာဟာ လူမှုအသိုင်းအဝိုင်းတွေကို ဒဏ်ခတ်ဖို့နဲ့ လူမှုရေးသံယောဇဉ်တွေကို ဖြတ်တောက်ဖို့အတွက် ရည်ရွယ်ချက်ရှိရှိ သုံးတဲ့ ဗျူဟာတစ်ခု ဖြစ်ပါတယ်။ ဒါဟာ ရုပ်ပိုင်းဆိုင်ရာနဲ့ စိတ်ပိုင်းဆိုင်ရာ ဒဏ်ရာတွေအပြင် လူမှုပတ်ဝန်းကျင်ကနေ ဖယ်ကြဉ်ခံရတာမျိုးအထိ တစ်သက်လုံး မပျောက်နိုင်တဲ့ စိတ်ဒဏ်ရာတွေ ကျန်ရစ်စေနိုင်ပါတယ်။

ဒီလို စက်ဆုပ်ရွံရှာဖွယ်ရာတွေကို အဆုံးသတ်ဖို့ဆိုရင် ကဏ္ဍသုံးခုမှာ လက်တွေ့အကောင်အထည်ဖော်ဖို့ လိုပါတယ်။ ပထမဆုံးက ကာကွယ်စောင့်ရှောက်ရေးပါ။ ဒါမှသာ ပဋိပက္ခဖြစ်ပွားရာ ဒေသတွေက ကလေးတွေ ဘေးကင်းလုံခြုံမှာ ဖြစ်ပါတယ်။ ဒုတိယကတော့ တာဝန်ခံမှု ရှိစေရေးပါ။ ဒါမှလည်း ကျူးလွန်ခံရသူတွေ တရားမျှတမှု ရရှိပြီး ကျူးလွန်သူတွေ ပြစ်ဒဏ်ခံရမှာ ဖြစ်ပါတယ်။ နောက်ဆုံးကတော့ လိင်ပိုင်းဆိုင်ရာ အကြမ်းဖက်မှုဖြစ်စေတဲ့ အကြောင်းရင်းတွေကို အမြစ်ပြတ်အောင်လုပ်တာ၊ သက်ဆိုင်ရာ အဖွဲ့အစည်းတွေကို ပိုမိုအားကောင်းလာအောင် လုပ်ဆောင်တာနဲ့ ကလေးသူငယ်တွေကို ဗဟိုပြုတဲ့ ဝန်ဆောင်မှုလုပ်ငန်းတွေမှာ ရင်းနှီးမြှုပ်နှံတာမျိုးတွေနဲ့ ကြိုတင်ကာကွယ်ရေးဖြစ်ပါတယ်။ ဒါ့အပြင် ထိခိုက်ခံစားခဲ့ရသူတွေ သူတို့ရဲ့ဘဝနဲ့ မိသားစုတွေကို ပြန်လည်ထူထောင်နိုင်ဖို့အတွက် ဘက်စုံကနေ ဝိုင်းဝန်းကူညီပေးဖို့ကလည်း တကယ်ကို အရေးကြီးပါတယ်။

စစ်ပွဲတွေမှာ ကလေးတွေကို ဘယ်တော့မှ ပစ်မှတ်မထားရပါဘူး။ သူတို့ကို ကာကွယ်ပေးဖို့ဆိုတာ တိုက်ခိုက်နေတဲ့သူတွေရော၊ နိုင်ငံတိုင်းမှာပါ ဥပဒေအရရော ကိုယ်ကျင့်တရားအရပါ မဖြစ်မနေ လုပ်ဆောင်ရမယ့် တာဝန်ဖြစ်ပါတယ်။

မကြာခဏဆိုသလို ပဋိပက္ခတွေကြောင့် ကလေးဘဝတွေ စောစောစီးစီး ပြီးဆုံးခဲ့ရတယ်။ ဒါပေမဲ့ စုပေါင်းပြီး မိန်းကလေးတိုင်း၊ ယောက်ျားလေးတိုင်း ဘေးကင်းကင်းနဲ့ ဂုဏ်သိက္ခာရှိရှိ ကြီးပြင်းလာနိုင်မယ့် အနာဂတ်မျိုးကို အားလုံး အတူ တည်ဆောက်နိုင်ပါတယ်။