၂၀၁၉ ခုနှစ် အပြည်ပြည်ဆိုင်ရာ လူ့အခွင့်အရေးနေ့တွင် ကုလသမဂ္ဂဌာနေညှိနှိုင်းရေးမှူးနှင့် လူသားချင်းစာနာထောက်ထားမှုဆိုင်ရာ ညှိနှိုင်းရေးမှူး အိုလာအယ်လ်မ်ဂရန်ထံမှ ကုလသမဂ္ဂဝန်ထမ်းများအားလုံးသို့ ပေးပို့သော သဝဏ်လွှာ

ယခုအခါ ကျွန်ုပ် မြန်မာနိုင်ငံသို့ ရောက်ရှိသည်မှာ နှစ်လကြာမြင့်ခဲ့ပြီဖြစ်ပြီး ရောက်ရှိလာသည့်အချိန်တွင် နွေးထွေးလှိုက်လှဲစွာ ကြိုဆိုပေးခဲ့ကြသည့်အတွက် လုပ်ဖော်ကိုင်ဖက်များအားလုံးကို လွန်စွာ ကျေးဇူးတင်ရှိ ကြောင်း ဦးစွာပထမ ပြောကြားလိုပါသည်။  

၂၀၁၉ ခုနှစ် အပြည်ပြည်ဆိုင်ရာ လူ့အခွင့်အရေးနေ့တွင် ကျွန်ုပ်တို့သည် မည်သူများဖြစ်ကြသည်၊ ကျွန်ုပ်တို့ မည်သည့်အလုပ်မျိုးကို လုပ်နေကြသည်ဟူသည်နှင့်စပ်လျဉ်းသည့် အတွေးအချို့ကို လုပ်ဖော်ကိုင်ဖက်များ အားလုံးထံ မျှဝေပြောကြားလိုပါသည်။ 

ကျွန်ုပ်တို့သည် မြန်မာနိုင်ငံကို ဒီမိုကရေစီနှင့် ငြိမ်းချမ်းရေးဆီသို့ ချီတက်နေသည့် လမ်းကြောင်း တစ်လျောက် ပံ့ပိုးကူညီပေးရန်၊ နိုင်ငံ၏ ဖွံ့ဖြိုးရေးပန်းတိုင်များ ပြည့်မီရေး ပူးပေါင်းလက်တွဲကူညီရန်၊ နိုင်ငံ တစ်ဝှမ်းရှိ ပဋိပက္ခနှင့် သဘာဝဘေးအန္တရာယ်များ ခံစားရသော ပြည်သူများထံ လူသားချင်းစာနာ ထောက်ထားမှု အကူအညီများ ပံ့ပိုးပေးရန်၊ ငြိမ်းချမ်းရေးလုပ်ငန်းစဉ်များတွင် ပံ့ပိုးပေးရန်၊ မြန်မာပြည်သူ များအားလုံး၊ အထူးသဖြင့် နောက်ဆုံးတွင် ကျန်ရစ်ခဲ့ကြသူများ၏ လိုအပ်ချက်များနှင့် အခွင့်အရေးများ အတွက် ရပ်တည်ပြောဆိုပေးရန် အပြည့်အဝ နှစ်မြှုပ်ကြိုးပမ်းဆောင်ရွက်နေကြခြင်း ဖြစ်ပါသည်။   

မြန်မာပြည်သူများကို အလုပ်အကျွေးပြုရာတွင် ကျွန်ုပ်တို့သည် ကုလသမဂ္ဂအဖွဲ့ကြီး၏ ပဋိညာဉ်စာချုပ်နှင့် အပြည်ပြည်ဆိုင်ရာ လူ့အခွင့်အရေးကြေညာစာတမ်းတို့တွင် ဖော်ပြပါရှိသည့် ရည်ရွယ်ချက်နှင့် အခြေခံ စည်းမျဉ်းများကို မမေ့မလျော့ဘဲ အစဉ်အမြဲ သတိရနေရမည်ဖြစ်ပါသည်။ ကုလသမဂ္ဂအဖွဲ့ကြီး၏ ဖြစ်တည်မှုနှင့် ကျွန်ုပ်တို့ လုပ်ဆောင်နေသော လုပ်ငန်းများအားလုံး၏ ပဓာနဦးတည်ချက်သည် လူ့အခွင့်အရေးများပင် ဖြစ်ပါသည်။ ယခုနှစ် အပြည်ပြည်ဆိုင်ရာ လူ့အခွင့်အရေးနေ့တွင် ကုလသမဂ္ဂ အထွေထွေအတွင်းရေးမှူးချုပ် ပြောကြားခဲ့သော မိန့်ခွန်းထဲတွင် အောက်ပါအတိုင်းပါရှိပါသည် - 

“လူတိုင်းသည် လူ့အခွင့်အရေးအားလုံးကို ခံစားပိုင်ခွင့်ရှိသည်။  နေရပ်သော်လည်းကောင်း၊ လူမျိုးသော် လည်းကောင်း၊ တိုင်းရင်းသားသော်လည်းကောင်း၊ ကိုးကွယ်သည့်ဘာသာသော်လည်းကောင်း၊ လူမှုရေး ဇစ်မြစ်သော်လည်းကောင်း၊ လိင်အပိုင်းအခြားသော်လည်းကောင်း၊ လိင်စိတ်ခံယူမှုသော်လည်းကောင်း၊ နိုင်ငံရေးခံယူချက် (သို့မဟုတ်) အခြားခံယူချက်များသော်လည်းကောင်း၊ မသန်စွမ်းမှုသော်လည်းကောင်း၊ ဝင်ငွေ (သို့မဟုတ်) အခြားအဆင့်အတန်းခွဲခြားမှုသော်လည်းကောင်း၊ မရှိဘဲ နိုင်ငံသားဆိုင်ရာ ရပိုင်ခွင့်များ၊ နိုင်ငံရေးဆိုင်ရာ ရပိုင်ခွင့်များ၊ စီးပွားရေးဆိုင်ရာ ရပိုင်ခွင့်များနှင့် ယဉ်ကျေးမှုဆိုင်ရာ ရပိုင်ခွင့်များ ရရှိထိုက်ပါ သည်။”

ဤပြောဆိုချက်သည် ကျွန်ုပ်တို့၏ တာဝန်ကို ဖွင့်ဆိုပြဋ္ဌာန်းချက်ပင် ဖြစ်ပြီး ထိုတာဝန်ကို ကျေပြွန်စွာ ထမ်းဆောင်နိုင်ရန် ကျွန်ုပ်တို့ အစဉ်အမြဲ ကြိုးပမ်းဆောင်ရွက်သွားသင့်ပါသည်။ 

ယခုနှစ် အပြည်ပြည်ဆိုင်ရာ လူ့အခွင့်အရေးနေ့အတွက် “အမွေရမည့်ကမ္ဘာ၊ အမွေရမည့် မြန်မာနိုင်ငံ” ဟု အမည်ရသည့် ဗီဒီယိုတစ်ခု ကျွန်ုပ်တို့ ရိုက်ကူးထုတ်လုပ်ထားပါသည်။ ယခုနှစ်၏ ကမ္ဘာလုံးဆိုင်ရာ ဆောင်ပုဒ် ဖြစ်သော “လူသားအားလုံးအခွင့်အရေး၊ လူငယ်များက ရပ်တည်ပေး” ဟူသော ဆောင်ပုဒ်နှင့် အညီ LGBT၊ လူမှုသဟဇာတဖြစ်မှု၊ လွတ်လပ်စွာ ထုတ်ဖော်ပြောဆိုခွင့်၊ ဒုက္ခသည်များနှင့် IDP များ၊ သဘာဝ ပတ်ဝန်းကျင် ဆိုင်ရာ အရေးကိစ္စများအတွက် လုပ်ဆောင်နေသော တက်ကြွလှုပ်ရှားသူ လူငယ်ငါးဦးက ၎င်းတို့၏ အမြင်များကို မျှဝေပေးထားသော ဗီဒီယို ဖြစ်ပါသည်။ ဗီဒီယိုထဲတွင် ထိုလူငယ်များက မြန်မာနိုင်ငံနှင့် ကမ္ဘာတစ်ဝှမ်းလုံးရှိ အနာဂတ်မျိုးဆက်သစ်များအတွက် ၎င်းတို့၏ မျှော်မှန်းချက်၊ ၎င်းတို့  ဆက်ခံလိုသော၊ လက်ဆင့်ကမ်းပေးခဲ့ချင်သော အမွေအနှစ်တို့ကို ထုတ်ဖော်ပြောဆိုထားပါသည်။ ထိုဗီဒီယိုကို ကြည့်ကြပါ၊ ပါရှိသော သတင်းစကားများကို သုံးသပ်ဆင်ခြင်ကြပါ၊ ထို့နောက် ဆက်လက်မျှဝေပေးကြပါဟု တိုက်တွန်း လိုပါသည်။ 

ကုလသမဂ္ဂအဖွဲ့ကြီးသည် မြန်မာပြည်သူများနှင့်၊ မြန်မာအစိုးရနှင့် လက်တွဲ၍ လူ့အခွင့်အရေးများကို အားပေးမြှင့်တင်သော၊ ကာကွယ်စောင့်ရှောက်ပေးသော ပိုမိုကောင်းမွန်သည့် အနာဂတ်ဆီသို့ ချီတက်နေသည့် ခရီးစဉ်အတွင်း အတူတကွ လိုက်ပါကူညီဆောင်ရွက်ပေးနေပါသည်။ ဤခရီးစဉ်တွင် ကျွန်ုပ်တို့အားလုံးသည် ပြည်တွင်းမိတ်ဖက်များ၊ နိုင်ငံတကာမိတ်ဖက်များနှင့် ဆက်သွယ်ညှိနှိုင်းပူးပေါင်းရင်း အရေးကြီးသည့် ပါဝင်ကူညီပံ့ပိုးမှုများကို ပြုလုပ်ပေးနိုင်ကြပါသည်။ ဤအတွက် သင်တို့ အားလုံး၏ ပံ့ပိုးကူညီမှုအတူ ကျွန်ုပ်တို့၏ အဆိုပါကိစ္စနှင့်စပ်လျဉ်းသော ဆွေးနွေးဖလှယ်မှုများကို ဆက်လက်ပြုလုပ် သွားနိုင်ရန် မျှော်လင့်မိပါသည်။  

ကျေးဇူးတင်ပါသည်။