သားဖွားဆရာမနှင့် HIV လူနာစောင့်ရှောက်ရေး စေတနာ့ဝန်ထမ်းတဖြစ်လဲ ရပ်ရွာအခြေပြုရေဖြန့်ဖြူးရုံ၏ ခေါင်းဆောင်ဖြစ်သူမလင်းလင်း

မြန်မာအမျိုးသမီးများအား ဂုဏ်ပြုသောအားဖြင့် ရန်ကုန်မြို့၊လှိုင်သာယာမြို့နယ်ရှိ ရပ်ရွာအခြေပြုရေသန့်ဖြန့်ဖြူးရုံမှ ခေါင်းဆောင်တဖြစ်လဲ သားဖွားဆရာမနှင့် HIV လူနာပြုစုစောင့်ရှောက်ရေး စေတနာ့ဝန်ထမ်းဖြစ်သူ မလင်းလင်း၏ UNDP၊ WaterAid တို့နှင့်အတူ ပူး‌ပေါင်းလက်တွဲ၍ သူမ၏ရပ်ရွာဝန်းကျင်အတွက် သောက်သုံးရေသန့်ရရှိအောင် ဆောင်ရွက်ခဲ့ပုံအကြောင်းအား ဖော်ပြအပ်ပါသည်။

မလင်းလင်းသည် သားဖွားဆရာမအဖြစ် အလုပ်အကိုင်အတွေ့အကြုံရှိပြီး ယခင်ကလည်း HIV ဝေဒနာရှင်များအတွက် စေတနာ့ဝန်ထမ်းအဖြစ် ပြုစုစောင့်ရှောက်ပေးခဲ့သည့်အလျှောက် သူမ၏ပတ်ဝန်းကျင်ရှိသူများကို ပံ့ပိုးကူညီခြင်း၏အရေးပါပုံအား  သိရှိထားပြီးဖြစ်သည်။ ထို့ကြောင့်လည်း သူမအနေဖြင့် ရပ်ရွာဝန်းကျင်အတွင်းရှိလူများ၏ ကျန်းမာရေးနှင့်သာယာဝပြောရေးကိုမြှင့်တင်ရန် သန့်ရှင်းသောသောက်သုံးရေရရှိအောင် လုပ်ဆောင်သည့်နေရာတွင် လိုအပ်သောအကူအညီများအား လုပ်အားပေးလုပ်ဆောင်ရင်း တက်ကြွစွာပါဝင်ခဲ့သည်။ 

ဤရပ်ရွာအခြေပြုရေဖြန့်ဖြူးရုံသည် လူပေါင်း (၆,၉၀၀) ကျော်အား သောက်သုံးရေသန့်တစ်ပုံးလျှင် ငွေကျပ် (၂၅၀)ကျပ်တည်းဖြင့် ရောင်းချထောက်ပံ့ပေးလျှက်ရှိသည်။ ထိုနှုန်းထားသည် ယခင်က လူများစွာကိုဖျားနာစေသော မသန့်ရှင်းသည့်သောက်သုံးရေအတွက် ပေးဆောင်ခဲ့ရသည့်အတိုင်းပင်ဖြစ်သည်။

"ကျွန်မတို့ရပ်ကွက်ကလူတွေ ဖျားနာကြတုန်းက ဝင်ငွေလည်းမရှိသလောက်နည်းတာကြောင့် ဆေးရုံစရိတ်မတတ်နိုင်ခဲ့ကြဘူး။ ဆေးရုံစရိတ်ပေးလိုက်ပြန်ရင်လည်း ရေဝယ်သုံး၊ဝယ်သောက်ဖို့ အပိုပိုက်ဆံကမရှိတော့ပြန်ဘူးလေ။ ဒီလိုနဲ့ပဲ သံသရာကလည်ပြီး ဘယ်တော့မှမဆုံးတော့ဘူး" ဟု မလင်းလင်းကပြောပြခဲ့ပါသည်။ 

“အခုတော့ ကျွန်မတို့တွေ သန့်ရှင်းတဲ့သောက်သုံးရေသန့်ကိုရရှိပြီး အဲဒီရေဖြန့်ဖြူးတဲ့လုပ်ငန်းကနေပဲ အပိုဝင်ငွေတွေရရှိပါတယ်။ ဒီလိုရပ်ရွာအ‌ခြေပြုရေဖြန့်ဖြူးရုံ စတင်ခဲ့တဲ့အချိန်ကစပြီး ကျွန်မတို့ရွာမှာ ဖျားနာသူဦးရေဟာ သိသိသာသာလျော့နည်းလာခဲ့ပါတယ်။ ကျွန်မတို့ရေဖြန့်ဖြူးတဲ့အုပ်စုရှိ အမျိုးသမီးတွေဟာဆိုရင်လည်း အခုဆိုရင်အလုပ်အကိုင်လေးတွေရရှိပြီး သူတို့ရဲ့လစဉ်ဝင်ငွေတွေကို ရရှိနိုင်ကြပြီလေ"  

ညောင်ရွာရှိ ရပ်ရွာလူထုအခြေပြု ရေဖြန့်ဖြူးရုံသည် UNDP မှပိုမိုကျယ်ပြန့်စွာ လုပ်ဆောင်လျှက်ရှိသောပရောဂျက်၏ တစ်စိတ်တစ်ပိုင်းဖြစ်သည်။ ၎င်းပရောဂျက်သည် ပုံမှန်ဝင်ငွေမရရှိဘဲ ရုန်းကန်နေရသည့် အမျိုးသမီးများအား ပံ့ပိုးကူညီပေးသွားမည်ဖြစ်ပြီး အမျိုးသမီးများ၏ အသက်မွေးဝမ်း‌ကျောင်းမှုလုပ်ငန်းများတွင် တိုးတက်ကောင်းမွန်စေ‌ရန်လိုအပ်သော သင်တန်းများပို့ချ‌ပေးခြင်းဖြင့် ဝင်ငွေဖန်တီးမှုနှင့် အလုပ်အကိုင်အခွင့်အလမ်းများ တိုးတက်များပြားလာအောင် လုပ်ဆောင်ပေးသွားမည်ဖြစ်သည်။ UNDP သည် လှိုင်သာယာမြို့နယ်တွင် ယခုအချိန်ထိ လူပေါင်း (၁၀၀,၀၀၀) ကျော်၏ ဘဝပြန်လည်ထူထောင်ရေးအတွက် ကူညီပေးသွားခဲ့ပြီးဖြစ်သည်။

အပြုသဘောဆောင်သော ပြောင်းလဲမှုတစ်ခု မိမိနေထိုင်ရာဝန်းကျင်တွင်ပြုလုပ်ရန် ယခုကဲ့သို့ခက်ခဲသောကာလများအတွင်း မလင်းလင်း၏ ခေါင်းဆောင်မှုစွမ်းရည်နှင့် ခိုင်မာသောသန္နိဌာန်ကဲ့သို့သော အရာများသည် အလွန်အရေးကြီးပါသည်။ သူမသည် သူမပတ်ဝန်းကျင်ရှိ အမျိုးသမီးများအား စံနမူနာပြခဲ့ပြီးဖြစ်သည်။ အမျိုးသမီးများ၏ဘဝ တိုးတက်ကောင်းမွန်ရေးအတွက် ရင်းနှီးမြှုပ်နှံ၍ အလုပ်အကိုင်ရာထူးများရရှိရန် ပံ့ပိုးကူညီပေးခြင်းသည် လူ့အဖွဲ့အစည်းအတွင်း ၎င်းတို့၏အခန်းကဏ္ဍကို မြှင့်တင်ရေးအတွက် အလွန်အရေးပါသော လုပ်ဆောင်မှုတစ်ခုဖြစ်သည်။