ပဋိပက္ခဘေးဒဏ်ကြုံတွေ့နေရသော ချင်းပြည်နယ် ပလက်ဝမြို့ထံ WFP ၏ အရေးပေါ်အထောက်အပံ့များ ထပ်မံရောက်ရှိ

“လမ်းခရီးအခက်အခဲတွေနဲ့ ‌ဒေသလုံခြုံရေးအခြေအနေမတည်ငြိမ်တဲ့ကြားက ပလက်ဝမြို့ဆီ ကျွန်တော်တို့ အရေးပေါ်အထောက်အပံ့တွေ ထပ်ပြီးပေးပို့နိုင်ခဲ့ပါတယ်။ ချင်းပြည်နယ်အစိုးရအပါအဝင် အဆင့်ဆင့်က တာဝန်ရှိသူတွေရဲ့  ကူညီပံ့ပိုးမှုကျေးဇူးကြောင့်လို့ ဆိုရမှာပါ” ဟု WFP ၏ မြန်မာနိုင်ငံဆိုင်ရာ ဌာနေကိုယ်စားလှယ် မစ္စတာ စတီဖန်အန်ဒါဆန်က ပြောသည်။ “ပလက်ဝမြို့နယ်အတွင်းမှာရှိနေတဲ့ မိသားစုတွေဟာ စျေးကွက်တွေ၊ အသက်မွေးဝမ်းကျောင်းအလုပ်အကိုင်တွေ ဆုံးရှုံးခဲ့ရတဲ့အခြေအနေကို ဆက်ပြီးရင်ဆိုင်နေကြရတာကြောင့် သူတို့ဆီ လူသားချင်းစာနာထောက်ထားမှုအကူအညီတွေ အဆက်မပြတ်ပေးပို့နိုင်ဖို့ တကယ့်ကို အရေးတကြီး လိုအပ်ပါတယ်။”

၂၀၂၀ ခုနှစ် မေလတွင် ပို့ဆောင်နိုင်ခဲ့သည့်အထောက်အပံ့များ၏ နောက်ဆက်တွဲအနေဖြင့် ယခုပို့ဆောင်ခဲ့သည့် အရေးပေါ် အထောက်အပံ့များတွင် ဆန်၊ ပဲ၊ ဆီ၊ ဆား နှင့် ခွန်အားမြှင့်အာဟာရမှုန့်များ ပါဝင်ပြီး လူဦးရေ ၄,၀၀၀ ကျော် အတွက် အချိန်ကာလ (၂) လခန့်ကြာ နေ့စဥ်စားနပ်ရိက္ခာ လုံလောက်စေမည်ဖြစ်ပါသည်။ ကလေးငယ်များနှင့် ကိုယ်ဝန်ဆောင်နှင့်နို့တိုက်မိခင်များအနေဖြင့် အာဟာရဖြည့်စွက်အစားအစာများကိုလည်း ရရှိကြမည်ဖြစ်ပါသည်။

ပြီးခဲ့သည့်လတွင် WFP အနေဖြင့် ပလက်ဝမြို့အနီးရှိ ဆမီးမြို့တွင်နေထိုင်လျက်ရှိသည့် စစ်ဘေးရှောင်လူထုအတွက် အချိန်ကာလ (၄) လစာ စားနပ်ရိက္ခာများကို ပို့ဆောင်သိုမှီးပေးထားနိုင်ခဲ့ပါသည်။

#                                  #                                  #

နှစ်တိုင်းတွင် နိုင်ငံပေါင်း ၈၀ ကျော်ရှိ လူဦးရေသန်းပေါင်းမြောက်များစွာကို ကူညီထောက်ပံ့နေသည့် ကုလသမဂ္ဂ ကမ္ဘာ့စားနပ်ရိက္ခာအစီအစဉ်သည် လူသားချင်းစာနာမှုအကူအညီပေးသည့် ဦးဆောင်အဖွဲ့အစည်းဖြစ်ပါသည်။ ကမ္ဘာတစ်ဝှမ်း သဘာဝဘေးနှင့် ပဋိပက္ခ အရေးပေါ်အခြေအနေများတွင် စားနပ်ရိက္ခာများ ထောက်ပံ့ပေးခြင်းနှင့် ‌‌ရေရှည်တည်တံ့ခိုင်မြဲသော ဖွံ့ဖြိုးမှုကို ဖော်ဆောင်ပေးခြင်းမှတစ်ဆင့် လူ့အသက်ကယ်ဆယ်ရေးနှင့် ပိုမိုကောင်းမွန်သည့် လူမှုဘဝအနာဂတ် ဖန်တီးပေးရေးကို ဆောင်ရွက်နေသည်။

တွစ်တာ @WFP_Media နှင့် @WFPAsiaPacific   ဝဘ်ဆိုက် www.wfp.org/countries/myanmar