လူအမြောက်အမြားသတ်ဖြတ်မှု (Holocaust) ကြောင့် အသက်ဆုံးရှုံးခဲ့သူများအား အောက်မေ့ဖွယ် နိုင်ငံတကာနေ့အတွက် ကုလသမဂ္ဂအတွင်းရေးမှူးချုပ်၏ သတင်းစကား

လူအမြောက်အမြားသတ်ဖြတ်မှု (Holocaust) အဆုံးသတ်ခဲ့တာ ဒီနှစ်မှာ နှစ် ၈၀ ပြည့်မြောက်ပြီ ဖြစ်ပါတယ်။

လူမျိုးစုတစ်ခုလုံးကို ဖျက်ဆီးဖို့ ကြိုးပမ်းခဲ့ရာမှာ နာဇီတွေနဲ့ သူတို့အပေါင်းအပါတွေရဲ့ သတ်ဖြတ်မှုခံခဲ့ကြရတဲ့ ဂျူးလူမျိုး ၆ သန်းအတွက် ကျွန်တော်တို့ ခေတ္တငြိမ်သက်ကာ ဝမ်းနည်း‌ခြင်းအထိမ်းအမှတ် ပြုကြပါတယ်။ 

ကျွန်ပြုခံရ၊ ညှင်းပန်း နှိပ်စက် သတ်ဖြတ်ခံခဲ့ကြရတဲ့ Roma နဲ့ Sinti လူမျိုးစုတွေ၊ မသန်စွမ်းသူတွေနဲ့ အခြားသူတွေ အားလုံးအတွက် ကျွန်တော်တို့ ဝမ်းနည်းကြေကွဲရပါတယ်။ 

သတ်ဖြတ်ခံခဲ့ရသူတွေ၊ အသက်ရှင်ကျန်ရစ်သူတွေနဲ့ သူတို့ရဲ့မိသားစုဝင်တွေနဲ့အတူ တသားတည်း ရပ်တည်ပါတယ်။

နောက်ပြီး ဘယ်တော့မှ မမေ့ဖို့ဆိုတဲ့ ကျွန်တော်တို့ရဲ့ ကတိကဝတ်ကို ထပ်လောင်း အတည်ပြုပါတယ်။

လူအမြောက်အမြားသတ်ဖြတ်မှု (Holocaust) ဖြစ်ရပ်ကို ကျွန်တော်တို့ရဲ့ မှတ်ဉာဏ်ကနေ မှေးမှိန်သွားစေတာဟာ အတိတ်ကို အရှက်ရစေတာဖြစ်သလို အနာဂတ်ကို သစ္စာဖောက်တာလည်းဖြစ်ပါတယ်။

အောက်မေ့သတိရတာက ကိုယ်ကျင့်တရားနဲ့ဆိုင်တဲ့ လုပ်ရပ်တစ်ခုပါ။ နောက်ပြီး လုပ်ဆောင်ဖို့ နှိုးဆော်မှုတစ်ခုလည်းဖြစ်ပါတယ်။

လူအမြောက်အမြားသတ်ဖြတ်မှု (Holocaust)ရဲ့ သမိုင်းကြောင်းကိုသိတာက လူသားတွေ နစ်မြုပ်နိုင်တဲ့ နက်ရှိုင်းမှုတွေကို သိနားလည်တာ …

တခြားသူတွေရဲ့ ပူးပေါင်းပါဝင်မှုနဲ့ နာဇီတွေ ဘယ်လို ရက်စက်ကြမ်းကြုတ်တဲ့ ပြစ်မှုတွေကို ကျူးလွန်ခဲ့ကြတယ်ဆိုတာကို သိနားလည်နိုင်တာ …

နောက်ပြီး အမုန်းတရားကို ဆန့်ကျင် ထုတ်ဖော်ပြောဆိုဖို့နဲ့ အားလုံးရဲ့ လူ့အခွင့်အရေးတွေအတွက် ရပ်တည်ဖို့ဆိုတဲ့ လေးနက်တဲ့ တာဝန်တစ်ခု ကျွန်တော်တို့ တစ်ဦးချင်းစီမှာ ရှိတယ်ဆိုတာကို သိမြင်နိုင်တာ ဖြစ်ပါတယ်။

လူအမြောက်အမြားသတ်ဖြတ်မှု (Holocaust) ငရဲခန်းဖြစ်ပွားပြီးနောက် နိုင်ငံတွေ စုဝေးခဲ့ကြတယ်။ ဒါ့ပြင် လူတိုင်းရဲ့ ဂုဏ်သိက္ခာကို အပြည်ပြည်ဆိုင်ရာ လူ့အခွင့်အရေးကြေညာစာတမ်းမှာ ထည့်သွင်းပြဌာန်းခဲ့ကြတယ်။ မှောင်မိုက်တဲ့အချိန်တွေမှာတော့ အဲဒီစာတမ်းက တောက်ပတဲ့အလင်းရောင်တစ်ခုအဖြစ် ဆက်ရှိနေပါတယ်။ 

လူအမြောက်အမြားသတ်ဖြတ်မှု (Holocaust)  အဆုံးသတ်ခဲ့တာ နှစ်ပေါင်း ၈၀ ကြာသည့်တိုင် နာဇီတွေ လူမျိုးတုံး သတ်ဖြတ်မှုကို ဖြစ်စေခဲ့တဲ့ အလားတူ မုသားတွေနဲ့ မလိုမုန်းထားမှုတွေကြောင့် ဂျူးမုန်းတီးရေးဝါဒဟာ ကျွန်တော်တို့နဲ့အတူ ရှိနေဆဲ ဖြစ်ပါတယ်။ 

ဒါ့အပြင် အဲဒါက တိုးမြင့်လာနေတာပါ။

ခွဲခြားဆက်ဆံမှုတွေ ထူပြောလာသလို မလိုမုန်းတီးမှုကလည်း ကမ္ဘာတစ်ဝန်းမှာ ပျံ့နှံ့နေပါတယ်။ 

ဖျောက်ဖျက်လို့ မရနိုင်တဲ့ သမိုင်းဝင် အချက်အလက်တွေကို လိုရာဆွဲပြီး မမှန်မကန်ပြောနေကြတာ၊ သေးသိမ်အောင်လုပ်နေကြပြီး ငြင်းပယ်နေကြပါတယ်။ 

နောက်ပြီး နာဇီတွေနဲ့ သူတို့ရဲ့ အပေါင်းအပါတွေကို ပြန်လည်ဦးမော့လာနိုင်အောင်နဲ့ အသွင်ပြောင်း လှုပ်ရှားနိုင်အောင် အားထုတ်ကြိုးပမ်းနေကြပါတယ်။ 

အဲဒီ ဆိုးသွမ်းမှုတွေကို ကျွန်တော်တို့ ရင်ဆိုင်ရဲရပါမယ်။

မတူကွဲပြားမှုတွေရှိနေတဲ့ လက်ရှိကာလမှာ နောက်ပြီး Hamas တွေရဲ့ ထိတ်လန့်ဖွယ်ကောင်းတဲ့ အောက်တိုဘာလ ၇ ရက်နေ့ အကြမ်းဖက် တိုက်ခိုက်မှုတွေဖြစ်ပွားခဲ့တဲ့အချိန်ကစပြီး ၁-နှစ်ကျော်ကြာပြီးတဲ့အ ချိန်မှာ ကျွန်တော်တို့တွေရဲ့ လူသားဖြစ်တည်မှုကို ခိုင်ခိုင်မာမာ ထိန်းသိမ်းထားရပါမယ်။

လူမျိုးရေးခွဲခြားမှု၊ မလိုမုန်းထားမှုနဲ့ ဘာသာရေး အယူသည်းမှု ပုံစံအားလုံးကို ရှုတ်ချရမှာဖြစ်သလို ဂျူးမုန်းတီးရေးဝါဒကိုလည်း ဆန့်ကျင်ရပါမယ်။

နောက်ပြီး အားလုံးရဲ့ လူ့အခွင့်အရေးနဲ့ ဂုဏ်သိက္ခာကို ကာကွယ်ဖို့ ကျွန်တော်တို့ရဲ့ ကတိကဝတ်ကို ထပ်လောင်း အတည်ပြုရပါမယ်။

အဲဒီအကြောင်းတရားတွေက ကုလသမဂ္ဂရဲ့ အဓိကကြောရိုးပါ။

ဒီတိုက်ပွဲမှာ ကျွန်တော်တို့ ဘယ်တော့မှ ယိမ်းယိုင်မှာမဟုတ်သလို ဘယ်တော့မှ မေ့မှာမဟုတ်ပါဘူး။