ပညာရေးကဏ္ဍ တိုက်ခိုက်ခံရမှုမှ ကာကွယ်ရေး နိုင်ငံတကာနေ့အထိမ်းအမှတ်အတွက် ကုလသမဂ္ဂအတွင်းရေးမှူးချုပ်၏ သတင်းစကား

ကမ္ဘာတစ်ဝန်း ဂါဇာမှသည် ဆူဒန်၊ မြန်မာ၊ ယူကရိန်း၊ ကိုလံဘီယာ၊ ကွန်ဂို ဒီမိုကရက်တစ်သမ္မတနိုင်ငံနဲ့ အခြားနေရာတွေထိပါ ကျောင်းသားတွေ၊ ဆရာတွေ၊ ပညာရေးဝန်ထမ်းတွေနဲ့ စာသင်ကျောင်းတွေကို တိုက်ခိုက်တာတွေဟာ ပြီးခဲ့တဲ့နှစ်တွေအတွင်းမှာ သိသိသာသာ တိုးမြင့်လာနေတာကို မြင်တွေ့ခဲ့ရပါတယ်။

ပဋိပက္ခတွေဖြစ်ပွားတိုင်း ရက်စက်စွာ လူသားတွေ ပေးဆပ်ကြရပါတယ်။ ဒါပေမဲ့ အဲဒီပဋိပက္ခငရဲတွင်းထဲ ပိတ်မိနေတဲ့ ကလေးငယ်တွေနဲ့ လူငယ်တွေအတွက် ပေးဆပ်ရတဲ့တန်ဖိုးက မရေတွက်နိုင်ပါဘူး။

လူငယ်တွေရဲ့ ကိုယ်၊ စိတ်နဲ့ စိတ်ဓာတ်ရေးရာတွေအပေါ် သက်ရောက်တဲ့ စစ်ဘေးဒဏ်ကို ဒီနေ့လို အရေးပါတဲ့နေ့က သတိပေးနေပါတယ်။ ထိခိုက်ဒဏ်ရာရမှုတွေကနေ အသက်ဆုံးရှုံးရမှုတွေအထိ၊ အတင်းအဓမ္မခေါ်ဆောင်ခံရတာ၊ ထွက်ပြေးတိမ်းရှောင်နေရတာ၊ လိင်ပိုင်းဆိုင်ရာ အကြမ်းဖက်မှု၊  စစ်မှုထမ်းဖို့ တပ်သားသစ်စုဆောင်းခံရတာနဲ့ အခွင့်အလမ်းတွေဆုံးရှုံးရတာတွေအထိ၊ ဘေးအန္တရာယ်တွေက ကြီးမားပါတယ်။

ပညာရေးဟာ အခြေခံကျတဲ့ လူ့အခွင့်အရေးတစ်ခုမျှသာ မဟုတ်ဘဲ လူ့အခွင့်အရေးတွေအားလုံး ရရှိခံစားနိုင်စေရေးအတွက်လည်း မရှိမဖြစ်အရေးပါပါတယ်။

ပညာရေးမှာ ရင်းနှီးမြှုပ်နှံဖို့၊ ပညာရေးနဲ့ စာသင်ကြားရာနေရာတွေကို ကာကွယ်စောင့်ရှောက်ရာမှာ အစွမ်းကုန် အားထုတ်ကြိုးပမ်းဖို့၊ ကျောင်းသားတွေနဲ့ ဆရာတွေကို အကာအကွယ်ပေးဖို့နဲ့ စာသင်ကြားရာနေရာတွေကို တိုက်ခိုက်မှု ကျူးလွန်သူတွေကို တာဝန်ခံရစေဖို့တို့အတွက် နိုင်ငံအားလုံးကို တောင်းဆိုပါတယ်။

လုံခြုံစိတ်ချရတဲ့ စာသင်ကျောင်းများဆိုင်ရာ ကြေညာချက် (Safe Schools Declaration) ကို အားလုံး သဘောတူ လက်မှတ်ရေးထိုးပြီး လိုက်နာဆောင်ရွက်ကြဖို့၊ ပညာရေးကဏ္ဍ တိုက်ခိုက်ခံရမှုမှ ကာကွယ်ရေး ကမ္ဘာလုံးဆိုင်ရာ ညွန့်ပေါင်းအဖွဲ့ (Global Coalition to Protect Education from Attack) ကို ပံ့ပိုးကူညီကြဖို့ နိုင်ငံအားလုံးကို တိုက်တွန်းပါတယ်။ ဒါ့ပြင် ပဋိပက္ခကာလတွင်းသာမက အပစ်အခတ်များရပ်တန့်သွားပြီးချိန်တွေမှာပါ ကလေးငယ်တွေနဲ့ လူငယ်တွေ ဆက်လက် ပညာသင်ကြားနိုင်စေဖို့အတွက် အားကုန်ထုတ်ကြိုးပမ်း ရပ်တည်ဖို့ကိုလည်း ကျွန်တော် တိုက်တွန်းပါတယ်။

ပညာရေးကဏ္ဍ တိုက်ခိုက်ခံရမှုမှ ကာကွယ်ကြရအောင်ပါ။ နောက်ပြီး နေရာတိုင်း ကလေးငယ်တိုင်းနဲ့ လူငယ်တိုင်း ရရှိရမဲ့ အခြေခံကျတဲ့ ပညာသင်ကြားခွင့်ရရှိရေး အခွင့်အရေးကို ကာကွယ်စောင့်ရှောက်ကြရအောင်ပါ။