အပြည်ပြည်ဆိုင်ရာ ဒီမိုကရေစီနေ့အတွက် ကုလသမဂ္ဂအတွင်းရေးမှူးချုပ်ရဲ့ သတင်းစကား

ဒီမိုကရေစီ၊ တရားဥပဒေ စိုးမိုးရေးနဲ့ လူ့အခွင့်အရေးကို လေးစားမှု ရှိတာဟာ အားလုံးပါဝင်ပြီး ကြံ့ကြံ့ခံနိုင်တဲ့ ငြိမ်းချမ်းတဲ့ လူမှုအသိုင်းအဝိုင်းတွေရဲ့ အခြေခံ အချက်တွေ ဖြစ်ပါတယ်။

ဒီအချက်တွေဟာ လူတစ်ဦးတစ်ယောက်ချင်းစီရဲ့ အခွင့်အရေးတွေနဲ့ ဂုဏ်သိက္ခာကို ကာကွယ်ပေးရုံသာမက စဥ်ဆက်မပြတ် ဖွံ့ဖြိုးတိုးတက်ရေးကို ပိုမိုတိုးတက်လာစေသလို လွတ်လပ်ခွင့်ကိုလည်း အာမခံပေးပါတယ်။

ဒီကနေ့ကျရောက်တဲ့ အပြည်ပြည်ဆိုင်ရာ ဒီမိုကရေစီနေ့မှာ လူမှုအသိုင်းအဝိုင်းတွေကို ပေးထားတဲ့ ကတိကဝတ်တွေကို ကျွန်တော်တို့ အသိအမှတ်ပြုပါတယ်။ တင်းမာမှုတွေနဲ့ မငြိမ်မသက်ဖြစ်နေတဲ့ အခုလိုအချိန်မှာ ကြုံ့တွေ့နေရတဲ့ ခြိမ်းခြောက်မှုအများအပြားကိုလည်း ကျွန်တော်တို့ သတိပြုမိပါတယ်။

နိုင်ငံသားတွေ လူမှုအဖွဲ့အစည်းတွေရဲ့ လှုပ်ရှားမှုအတွက် နေရာတွေ ကျဥ်းမြောင်းလာနေပါတယ်။

သတင်းတု၊ သတင်းမှားတွေဟာ ပြည်သူတွေရဲ့ ထုတ်ဖော်ပြောဆိုချက်တွေကို အဆိပ်အတောက် ဖြစ်စေသလို၊ လူမှုအသိုင်းအဝိုင်းတွေကိုလည်း နှစ်ခြမ်းကွဲစေပါတယ်။ နောက်ပြီး အဖွဲ့အစည်းတွေကြားမှာလည်း ယုံကြည်မှု ပျက်ပြားစေပါတယ်။

“မျိုးဆက်သစ်တွေကို နေရာပေးပါ” ဆိုတဲ့ ဒီနှစ်ရဲ့ ဆောင်ပုဒ်ဟာ ဒီကနေ့ ခေတ်နဲ့ အနာဂတ် ကာလတွေမှာ ဒီမိုကရေစီ ကာကွယ်စောင့်ရှောက်ရေးအတွက် လူငယ်တွေနဲ့ ကလေးငယ်တွေရဲ့ အရေးပါတဲ့ အခန်းကဏ္ဍကို အလေးအနက်ထားတာ ဖြစ်ပါတယ်။

လူငယ်တွေနဲ့ ကလေးငယ်တွေရဲ့ အသံကို နားဆင်တာ မလုံလောက်သေးပါဘူး။

ပညာရေး၊ အတတ်ပညာပိုင်းဆိုင်ရာ မြှင့်တင်မှုနဲ့ တသက်တာ သင်ယူလေ့လာမှု ကဏ္ဍတွေမှာ ရင်းနှီးမြှုပ်နှံမှုတွေ အများအပြားလုပ်ပြီး သူတို့ကို အားပေးအားမြှောက်ပြုရပါမယ်။

လူ့အခွင့်အရေးကိုလည်း ကာကွယ်ရမယ်။ ကျား-မ တန်းတူညီမျှမှုကိုလည်း မြှင့်တင်ရပါမယ်။

နောက်ပြီး အလွှာစုံက ဆုံးဖြတ်ချက်ချတဲ့ လုပ်ငန်းစဥ်တွေမှာ လူငယ်တွေရဲ့ အဓိပ္ပာယ်ပြည့်ဝတဲ့ ပါဝင်ဆောင်ရွက်မှုကို တိုးချဲ့ရပါမယ်။

ဒီကနေ့လို အရေးပါတဲ့နေ့မှာ လူသားအားလုံးအတွက် ပိုမိုမျှတတဲ့ ကမ္ဘာကြီးတစ်ခု တည်ဆောက်ဖို့ မတူတဲ့ မျိုးဆက်တွေ အတူလက်တွဲပြီး တစုတစည်းထဲ ဆောင်ရွက်ကြရအောင်ပါ။