ကုလသမဂ္ဂအတွင်းရေးမှူးချုပ်၏ ဘာသာရေး သို့မဟုတ် ကိုးကွယ်ယုံကြည်မှုကြောင့် အကြမ်းဖက်ခံရသူများအား အောက်မေ့ဖွယ် နိုင်ငံတကာနေ့ သတင်းစကား

ဒါပေမဲ့ ကမ္ဘာတစ်ဝန်းက ပြည်သူတွေနဲ့ လူမှုအသိုင်းအဝိုင်းတွေ၊ အထူးသဖြင့် လူနည်းစု အသိုင်းအဝိုင်းတွေဟာ သူတို့ရဲ့ ဝတ်ပြုဆုတောင်းရာနေရာတွေ၊ အသက်မွေးဝမ်းကျောင်းနဲ့ သူတို့ရဲ့ဘဝတွေကိုတောင် ချုပ်ချယ်ခံရ၊ ခွဲခြားဆက်ဆံမှု၊ ခြိမ်းခြောက်မှုတွေနဲ့ ရင်ဆိုင်နေရပါတယ်။ အွန်လိုင်းမှာရော အပြင်မှာပါ လှုံ့ဆော်တဲ့ အမုန်းတရားက မကြာခဏဆိုသလို အကြောင်းရင်း ဖြစ်နေလေ့ရှိပါတယ်။

သြဂုတ်လ ၂၂ ရက်နေ့မှာ ကျရောက်တဲ့ ဘာသာရေး သို့မဟုတ် ကိုးကွယ်ယုံကြည်မှုကြောင့် အကြမ်းဖက်ခံရသူများအား အောက်မေ့ဖွယ် နိုင်ငံတကာနေ့မှာ တွေ့ကြုံခံစားခဲ့ရသူအားလုံးကို ကျွန်တော်တို့ အမှတ်တရရှိနေပါတယ်။ နောက်ပြီး လက်သင့်မခံနိုင်တဲ့ ဆိုးဝါးတဲ့ အဲဒီ အပြုအမူတွေကို ပိုဆိုးစေတဲ့ အမုန်းစကားတွေကို ဖယ်ရှားဖို့ ထပ်မံပြီး သန္နိဋ္ဌာန်ပြုပါတယ်။  အမုန်းစကားနဲ့ ပတ်သက်လို့ ကုလသမဂ္ဂရဲ့ နည်းဗျူဟာနဲ့ စီမံချက်၊ လူ့အခွင့်အရေးအတွက် အရေးယူဆောင်ရွက်ဖို့ ကျွန်တော့်ရဲ့ တောင်းဆိုချက်တွေလို ကနဦး ဆောင်ရွက်ချက်တွေဟာ အဲဒီလို ဖယ်ရှားနိုင်ဖို့ အသေးစိတ်အစီအစဥ်တစ်ရပ်ကို ပေါ်ပေါက်လာစေမှာ ဖြစ်ပါတယ်။

ဘာသာရေးနဲ့ သက်ဝင်ယုံကြည်မှုတို့အပေါ် အခြေခံတဲ့ အကြမ်းဖက်လုပ်ရပ်တွေကို ကန့်သတ်တားဆီးဖို့နဲ့ အရေးယူဆောင်ရွက်ဖို့ အစိုးရအားလုံးကို ကျွန်တော် တိုက်တွန်းပါတယ်။ အထူးသဖြင့် နိုင်ငံရေး၊ လူမှုအသိုင်းအဝန်းနဲ့ ဘာသာရေး ခေါင်းဆောင်တွေ အပါအဝင် လူတိုင်းကိုလည်း အကြမ်းဖက်မှုကို ဦးတည်တဲ့ အမုန်းတရားနဲ့ လှုံ့ဆော်မှုတွေကို ဆန့်ကျင်ကြောင်း ထုတ်ဖော်ပြောဆိုကြဖို့ ကျွန်တော် တောင်းဆိုပါတယ်။  နောက်ပြီး အွန်လိုင်းပေါ်က အမုန်းတရားတွေကို ကိုင်တွယ်ဖြေရှင်းဖို့ လာမယ့်နှစ်မှာ ကျင်းပမယ့် “အနာဂတ် ညီလာခံ” မတိုင်ခင် ဒစ်ဂျစ်တယ်ပလက်ဖောင်းဆိုင်ရာ သတင်းအချက်အလက် ခိုင်မာမှုအတွက် ကျင့်ဝတ်တစ်ခုကို သဘောဆန္ဒအလျောက် ရေးဆွဲနိုင်ဖို့အတွက် ကုလသမဂ္ဂရဲ့ ဆောင်ရွက်ချက်တွေကို ထောက်ပံ့ကူညီဖို့ အစိုးရတွေ၊ နည်းပညာကုမ္ပဏီတွေနဲ့ အခြားသက်ဆိုင်သူတွေကို ကျွန်တော် တိုက်တွန်းပါတယ်။

မတူကွဲပြားမှုကို ကြိုဆိုတဲ့ ကမ္ဘာတစ်ခု၊ ပိုမိုပါဝင်နိုင်ပြီး လေးစားမှုရှိတဲ့ ငြိမ်းချမ်းတဲ့ကမ္ဘာတစ်ခုကို တည်ဆောက်နိုင်ဖို့ ကြိုးပမ်းအားထုတ်ရင်း အကြမ်းဖက်မှုဒဏ် ခံစားခဲ့ကြရသူတွေကို အတူတကွ အားပေးကြရအောင်ပါ။