ရေဘေးသင့်ပြည်သူများအတွက် အရေးပေါ်စားနပ်ရိက္ခာအကူအညီ WFP စတင် ပေးဝေ

ဇွန်လနှောင်းပိုင်းမှစတင်ခဲ့သည့် မုတ်သုံမိုး သည်းထန်စွာ ရွာသွန်းမှုနှင့်အတူ ဖြစ်ပေါ်လာသည့် ပြင်းထန်သော ရေကြီးရေလျှံမှုများကြောင့် မြန်မာနိုင်ငံတွင် လူဦးရေပေါင်း ၂၀၀,၀၀၀ ကျော် ထိခိုက်ခဲ့ကြရပြီး အများအပြားမှာ ယာယီနေရပ်စွန့်ခွာတိမ်းရှောင်ခဲ့ကြရသည်။ WFP ၏ Advanced Disaster Analysis & Mapping ဂြိုလ်တုပုံရိပ်၏ သြဂုတ်လ ၆ ရက်နေ့ ခန့်မှန်းချက်အရ ရေကြီးရေလျှံမှု ကြုံတွေ့နေရသောဒေသများ၌ လူဦးရေပေါင်း ၈၅၅,၀၀၀ ခန့် နေထိုင်လျက်ရှိကြောင်း သိရသည်။

“မြန်မာနိုင်ငံမှာ စားနပ်ရိက္ခာမလုံလောက်မှု အရေးပေါ်အခြေအနေရောက်နေတဲ့အချိန်မှာမှ ရေဘေးကဖြစ်လာရပြန်ပါတယ်၊” ဟု WFP ၏ မြန်မာနိုင်ငံဆိုင်ရာ ဌာနေကိုယ်စားလှယ် Mr. Paolo Mattei က ပြောသည်။ "နိုင်ငံတစ်ဝန်းမှာ လူဦးရေပေါင်း ၁၃ သန်းကျော်ဟာ စားနပ်ရိက္ခာအခက်အခဲတွေနဲ့ ရုန်းကန်နေရတဲ့အချိန်မှာ အခုလို ရေဘေးဖြစ်တာကြောင့် သူတို့အနေနဲ့ ပိုပြီး ထိခိုက်လွယ်တဲ့အခြေအနေကို ရောက်ကြရတယ်။" ဟု Mr. Paolo Mattei က ပြောသည်။

လက်ရှိတွင် WFP ဝန်ထမ်းအဖွဲ့များသည် ကချင်ပြည်နယ်၊ ကရင်ပြည်နယ်၊ စစ်ကိုင်းတိုင်းဒေသကြီး၊ ပဲခူးတိုင်းဒေသကြီးနှင့် မကွေးတိုင်းဒေသကြီးတို့တွင် ရေဘေးသင့်ပြည်သူ အနည်းဆုံး ၁၂၀,၀၀၀ အတွက် အသက်ကယ်ဆယ်ရေးအထောက်အပံ့များ ပေးလျက်ရှိပါသည်။ WFP ၏ အထောက်အပံ့တွင် ငွေသား၊ ဆန်၊ အာဟာရမှုန့်များနှင့် အာဟာရဖြည့်ဘီစကွတ်များ ပါဝင်သည်။

WFP ၏ ရေဘေးကူညီမှုများသည် အခြေခံလိုအပ်ချက်များကို ဖြည့်ဆည်းပေးသည့် ဒေသခံပရဟိတအဖွဲ့အစည်းများ၏ ကနဦးပံ့ပိုးကူညီမှုကို အားဖြည့်ပံ့ပိုးပေးရန် ရည်ရွယ်ပါသည်။ လက်ရှိ နိုင်ငံအနှံ့အပြားတွင် ရေကြီးရေလျှံမှုများ ဆက်လက်ဖြစ်ပေါ်လျက်ရှိရာ WFP အနေဖြင့် အခြေအနေကို ဆက်လက်စောင့်ကြည့်နေပြီး လိုအပ်ပါက  ရေဘေးတုံ့ပြန်မှုလုပ်ငန်းကို ထပ်မံတိုးချဲ့ ဆောင်ရွက်သွားရန် အဆင်သင့်ပြင်လျက်ရှိပါသည်။

ဓါတ်ပုံများကို အောက်ပါ link တွင် ရယူနိုင်ပါသည်။

https://wfp.sharepoint.com/:f:/s/WFPMM35/EqDYGaTNTaBLjVvwq_U_gIEBuGi5dXXGs19Q7pjGT4Mmfg?e=FSwxTS