မြန်မာနိုင်ငံဆိုင်ရာ လူသားချင်းစာနာမှုဆိုင်ရာ ဌာနေ ညှိနှိုင်းရေးမှူး (ယာယီ) မစ္စတာ မာကိုလူဂျီ ကော်စီက ရန်ကုန်မြို့မှ ဂျနီဗာမြို့ရှိ သတင်းထောက်များအား ပြောကြားသည့် အဖွင့်နိဒါန်းစကား
(အလွတ်သဘော ဘာသာပြန်ဆိုချက်)
တိုက်ရိုက်ပြောကြားခဲ့သည့်အတိုင်း
မြန်မာနိုင်ငံ၏ အခြေအနေနဲ့ပတ်သက်ပြီး ဒီကနေ့မှာ ကျွန်တော့်ကို တင်ပြခွင့်ပေးတဲ့အတွက် ကျေးဇူးတင်ပါသည်။ အားလုံးတွေ့မြင်ပြီးကြတဲ့အတိုင်း ငလျင်တွေရဲ့ သက်ရောက်မှုအတိုင်းအတာဟာ အင်မတန် ကြီးမားပြီး ပြည်နယ်နဲ့ တိုင်း အတော်များများထိ ကျယ်ကျယ်ပြန့်ပြန့် သက်ရောက်ခဲ့ပါတယ်။ အထူးသဖြင့် အပူပိုင်းဒေသလို့ခေါ်တဲ့ နိုင်ငံရဲ့ အလယ်ပိုင်းမှာ ဖြစ်ပါတယ်။
သက်ရောက်မှု အတိုင်းအတာ အပြည့်အဝနဲ့ ပတ်သက်ပြီး သတင်းစုဆောင်းနေဆဲဖြစ်ပေမယ့် ကနဦးအစီရင်ခံစာတွေအရ ငလျင်ဘေးသင့်သူ အများအပြားရှိပြီး အဆောက်အဦးတွေ အကြီးအကျယ်ပျက်စီးခဲ့တာ တွေ့ရပါတယ်။ ကျွန်တော်တို့တွေ မနေ့ညကမှ (နေပြည်တော်ကနေ)ပြန်လာခဲ့တာ ဖြစ်လို့ ပျက်စီးမှုတွေက တော်တော်လေးများတယ်လို့ ပြောနိုင်ပါတယ်။ လမ်းတွေ၊ တံတားတွေ၊ ဆေးရုံတွေ၊ စာသင်ကျောင်းတွေနဲ့ ပြည်သူတွေရဲ့ နေအိမ်တွေပါ ပျက်စီးကုန်တာပါ။
လူ့အသက်ဆုံးရှုံးမှုတွေ ဆိုးဆိုးရွားရွား ဖြစ်နေပြီး သေဆုံးသူဦးရေ ဆက်လက် တိုးလာနေဆဲဖြစ်ပါတယ်။
ငလျင်ဘေးသင့်ခဲ့တဲ့ ဒေသတွေမှာ နေထိုင်သူဦးရေ သန်းနဲ့ချီရှိလို့ ထိခိုက်သေဆုံးသူအရေအတွက် များပြားတယ်လို့လည်း သတင်းပေးပို့ချက်တွေမှာ ကျယ်ကျယ်ပြန့်ပြန့် တွေ့ရပါတယ်။ လက်ရှိအချိန်ထိ လူပေါင်း ၁၇၀၀ ကျော်သေဆုံးခဲ့ပြီး၊ ၃၄၀၀ ကျော် ထိခိုက်ဒဏ်ရာရကာ ၂၀၀ ကျော် ပျောက်ဆုံးနေဆဲဖြစ်ပြီး တိုးလာဖို့သာရှိပါတယ်။ ရှာဖွေ ကယ်ဆယ်ရေး (ကြိုးပမ်းမှုတွေ) ဆက်လက်လုပ်ဆောင်နေပေမယ့် ငလျင်လှုပ်ခတ်ပြီးတာ ၇၂ နာရီ ကျော်သွားပြီ ဖြစ်လို့ သေဆုံးသူအရေအတွက် မြင့်တက်လာဖွယ် ရှိနေပါတယ်။
ငလျင်ဘေးသင့်ခဲ့ရတဲ့ ဒေသခံလူထုတွေရဲ့ လတ်တလော လိုအပ်ချက်တွေဟာ ပိုတိုးလာပြီး အရေးတကြီး လိုအပ်နေကြတာပါ။ အမိုးအကာ၊ အစားအစာ၊ ရေသန့်နဲ့ မရှိမဖြစ်လိုအပ်တဲ့ အိမ်သုံးပစ္စည်းတွေ အားလုံးလည်း ပြတ်လပ်နေပါတယ်။
လျှပ်စစ်မီးမရှိ ရေလည်း မရလို့ ငလျင်ဘေးသင့်ခဲ့ရတဲ့ ဒေသတွေက လူတချို့ဟာ ကျွန်တော်တို့ အဖွဲ့သားတွေ၊ တခြား လူမှုကရုဏာလုပ်သားတွေနဲ့အတူ လွင်တီးခေါင်မှာ ညလုံးပေါက် နေကြရပါတယ်။နွေရာသီ ဖြစ်လို့ အင်မတန် ပူပြင်းလှပါတယ်။ နေအိမ်တွေလည်း ပျက်စီးကုန်တာ ဒါမှမဟုတ် ဖျက်ဆီးခံထားရပါတယ်။ နောက်ပြီး နောက်ဆက်တွဲငလျင်တွေလည်း လှုပ်ခတ်နေပြီး လူတွေဟာ အိမ်ထဲဝင်ဖို့ကိုတောင် ထိတ်လန့်နေကြပါတယ်။
မြန်မာနိုင်ငံတွင်းမှာရှိနေတဲ့ လူသားချင်းစာနာမှုဆိုင်ရာ အဖွဲ့အစည်းတွေဖြစ်တဲ့ ကုလသမဂ္ဂ အေဂျင်စီတွေနဲ့ မိတ်ဖက်အဖွဲ့တွေဟာ လက်ရှိအချိန်မှာ အဲဒီဒေသတွေမှာ ရှိနေပြီး ထောက်ပံ့ရေးပစ္စည်းတွေကို အားကြိုးမာန်တက် ပို့ဆောင်ပေးနေပါတယ်။ လိုအပ်ချက်အတိုင်းအတာ အပြည့်အဝကို ဆန်းစစ်ဖို့ မြန်ဆန်တဲ့ တုံ့ပြန်ဆောင်ရွက် စိစစ်မှုတွေကိုလည်း ဆောင်ရွက်နေကြပါတယ်။
ထောက်ပံ့ရေးပစ္စည်းတွေထဲမှာ ရိက္ခာ၊ သောက်ရေ (သောက်ရေလိုအပ်ချက်က အင်မတန် ကြီးမားပါတယ်)၊ ပြည်သူတွေနေထိုင်နိုင်ဖို့ ယာယီခိုလှုံစရာတွေ ပါဝင်ပါတယ်။ ဆေးဝါးတွေကလည်း အလွန်အရေးကြီးတယ်လို့ ပြောလိုပါတယ်။ အဲဒီဒေသတွေက ရေကြောင့်ဖြစ်တဲ့ ပြင်းထန် ဝမ်းပျက်ဝမ်းလျှောရောဂါ၊ ကာလဝမ်းရောဂါ ဖြစ်ပွားမှုတွေလည်း ရှိခဲ့ပါတယ်။ ကမ္ဘာ့ကျန်းမာရေးအဖွဲ့ WHO က လုပ်ဖော်ကိုင်ဖက်များကလည်း အဲဒီအကြောင်းကို ပြောကြားသွားပါလိမ့်မယ်။ နောက်ပြီး မုတ်သုံရာသီ ရောက်တော့မယ်ဆိုတာကိုလည်း ကျွန်တော်တို့ ထည့်သွင်းစဉ်းစားဖို့လိုပါလိမ့်မယ်။
ဒါကြောင့် မြန်မာပြည်က ပြည်သူတွေဆီ အကူအညီတွေ ရောက်ရှိရေးအတွက် ကျွန်တော်တို့ လေးနက်စွာ ဆက်လက် ကတိကဝတ်ပြုပါတယ်။ လူမှုကရုဏာလုပ်သားတွေဟာ ရှေ့တန်းကနေ ကူညီကယ်ဆယ်ရေးတွေ လုပ်နေတဲ့ ဒေသခံတွေနဲ့အတူ လှုပ်ရှား ဆောင်ရွက်နေပြီး အရေးပေါ် အသက်ကယ်အထောက်အပံ့တွေ ပေးပို့နိုင်ရေး အတူ ညှိနှိုင်းဆောင်ရွက်နေပါတယ်။
ရှာဖွေ ကယ်ဆယ်ရေးကျွမ်းကျင်အဖွဲ့တွေက အပျက်အစီးပုံတွေကြား ပိတ်မိနေသူတွေကို ရှာဖွေဖို့ လုပ်ဆောင်နေပါတယ်။ ဒါပေမဲ့လည်း ငလျင်လှုပ်ပြီးတာ ၇၂ နာရီကျော်သွားပြီဖြစ်လို့ ရှာဖွေရေးအောင်မြင်နိုင်မှုအခွင့်အလမ်းကတော့ အမှန်ပင် နည်းလာနေပါတယ်။
မြန်မာနိုင်ငံဟာ စိုးရိမ်စရာကောင်းတဲ့ လူသားချင်းစာနာမှုဆိုင်ရာ အကျပ်အတည်း ကြုံတွေ့နေရပြီး ဖြစ်တယ်လို့ ပြောရပါမယ်။ ကျွန်တော်ရောက်ကတည်းက ဆက်လက် ဖြစ်ပွားနေတဲ့ ပဋိပက္ခတွေအပြင် အလွန် အင်အားပြင်းတဲ့ ဆိုင်ကလုန်းမုန်တိုင်းက နိုင်ငံရဲ့ မြောက်ဖက်ပိုင်းကနေ အနောက်မြောက်ပိုင်းအထိ ထိခိုက်စေခဲ့တာ ရှိပါတယ်။ ပြီးခဲ့တဲ့နှစ်က တကယ်တော့ ပြီးခဲ့တဲ့လအနည်းငယ်ကပဲ ရေကြီးရေလျှံမှု အကြီးအကျယ် ဖြစ်ခဲ့ပါသေးတယ်။ အခုတခါက ငလျင်ဒဏ်အပြင် ဝမ်းရောဂါပါ ပါပါတယ်။
လူသားချင်းစာနာမှုဆိုင်ရာ လိုအပ်ချက်များနှင့် တုံ့ပြန်ရေးအစီအစဉ် (HNRP) အရ လူသားချင်းစာနာမှု အကူအညီလိုအပ်နေသူပေါင်း ၁၉.၉ သန်းရှိပါတယ်။ ဒါက ငလျင်မလှုပ်ခင်ကပါ။ ဒါ့ကြောင့် ငလျင်ရဲ့ ထပ်ဆောင်းသက်ရောက်မှုက ပို၍ ပို၍ များပြားတဲ့ အသက်တွေကို အန္တရာယ်တွင်းကျစေပါတယ်။ ငလျင်လှုပ်တိုင်း လူတွေရဲ့ ကြံကြံခံနိုင်စွမ်းကျဆင်းပြီး သူတို့ရဲ့ ကြံကြံခံနိုင်စွမ်း ပြန်လည်မြင့်တက်လာစေနိုင်ခြေကို အကန့်အသတ်ဖြစ်စေပါတယ်။ နောက်ပြီး လူ သန်းပေါင်းများစွာဟာ နေအိမ်တွေကနေ စွန့်ခွာထွက်ပြေးနေကြရပြီး ၁၅သန်းကျော်မှာ ငတ်မွတ်ခေါင်းပါးမှုဒဏ် ခံစားနေရသည့်အပြင် အရပ်သားပြည်သူတွေဟာ တိုးမြင့်လာနေတဲ့ အကာအကွယ်ဆိုင်ရာ စိုးရိမ်ပူပန်မှုတွေကိုပါ ခံစားနေရပါတယ်။
ဒါကြောင့် ကမ္ဘာကြီးဟာ မြန်မာပြည်သူတွေကို တိုးမြှင့် ထောက်ပံ့ကူညီပေးဖို့ အချိန်တန်ပါပြီလို့ ရိုသေလေးစားစွာပြောလိုပါတယ်။ မြန်မာနိုင်ငံဟာ တခြားအရေးပေါ် အခြေအနေအမျိုးမျိုးကြားမှာ ထိပ်ဆုံးနေရာမှာ ရှိမနေဘူးလို့ ကျွန်တော်တို့တွေ ပြောနေဆဲပါ။ တခြားအရေးပေါ်အခြေအနေတွေနဲ့ နှိုင်းယှဉ်နေတယ်လို့ ပြောလိုတာ မဟုတ်ပေမယ့် မြန်မာပြည်သူတွေဟာ ကမ္ဘာကြီးရဲ့ အာရုံစိုက်မှု ခံရသင့်တာကြောင့် လူတိုင်းက ပိုမိုကြီးမားစွာ အလေးပေးရမဲ့ အရေးကိစ္စ အမှန်ဖြစ်ပါတယ်။
နောက်ပြီး မြန်မာနိုင်ငံတွင်းမှာ လူသားချင်းစာနာမှုဆိုင်ရာ တုံ့ပြန်ဆောင်ရွက်မှုအတွက် ရန်ပုံငွေမလုံလောက်ခဲ့သည်မှာ နှစ်ပေါင်းများစွာကြာခဲ့ပြီဖြစ်ပါတယ်။ ဒီနှစ်အတွင်း လေးလထဲ ရောက်လာချိန်မှာ လူသားချင်းစာနာမှုဆိုင်ရာ တုံ့ပြန်ဆောင်ရွက်မှုအတွက် စုစုပေါင်းလိုအပ်သည့် အမေရိကန် ဒေါ်လာ ၁.၁ ဘီလီယံ၏ ၅ ရာခိုင်နှုန်းအောက်သာ ရရှိထားပါတယ်။
ဒါ့ကြောင့် ငလျင်ကြောင့် လိုအပ်ချက်တွေ တိုးမြင့်လာတာနှင့်အမျှ အသက် ကယ်ဆယ်ရေးအတွက် အရေးပေါ် ရန်ပုံငွေဟာ အလွန် အရေးပါ ပါတယ်။
ကုလသမဂ္ဂ ဗဟိုအရေးပေါ် တုံ့ပြန်မှု ရန်ပုံငွေကနေ ငလျင်အတွက် ဒေါ်လာ ၅ သန်းထောက်ပံ့ကာ လိုအပ်ချက်တွေအတွက် လျင်မြန်စွာ တုံ့ပြန်ဆောင်ရွက်နေပါတယ်။ ရန်ပုံငွေအများစုကို အမိုးအကာ၊ ကာကွယ်စောင့်ရှောက်ရေး၊ ရေနှင့် တကိုယ်ရေသန့်ရှင်းရေး စတာတွေမှာ သုံးစွဲသွားမှာ ဖြစ်ပါတယ်။
ကျေးဇူးတင်ပါတယ်။ မေးမြန်းဖြေကြားမှုကဏ္ဍတွင် မေးမြန်းလိုသည်များကို ဖြေကြားသွားပါမည်။
မိန့်ခွန်းပြောသူ
မာကိုလူဂျီ ကော်စီ
လုပ်ငန်းရပ်များဖြင့်ပံ့ပိုးပေးနေသော ပန်းတိုင်များ
