မီဒီယာများအား အသိပေးခြင်း - မြန်မာနိုင်ငံဆိုင်ရာ မေးခွန်းများကို ပြန်လည်ဖြေကြားခြင်း

မြန်မာနိုင်ငံဆိုင်ရာ ကုလသမဂ္ဂ အထူးကိုယ်စားလှယ် ဂျူလီ ဘစ်ရှော့သည် ငလျင်ကြီးလှုပ်ခတ်ခဲ့မှုကြောင့် ယခင်ကတည်းက ဆိုးရွားနေပြီးဖြစ်သည့် အခြေအနေများပိုမိုဆိုးရွားလာသည့် မြန်မာပြည်သူပြည်သားများနှင့်အတူ တသားတည်းရပ်တည်လျက်ရှိပါသည်။ သူမသည် ငလျင်ဒဏ်ကိုယ်တွေ့ကြုံတွေ့ခဲ့ရသူများ၏ ဆင်းရဲဒုက္ခများအတွက် များစွာ ဝမ်းနည်းကြေကွဲရပါသည်။ ပျက်စီးဆုံးရှုံးမှုများ ကြီးမားပြင်းထန်သောကြောင့် များစွာသော ငလျင်ဘေးသင့်ခဲ့သူများထံ ယခုထိ ကူညီထောက်ပံ့မှုများ မရောက်ရှိဆဲဖြစ်ပါသည်။  

ငလျင်သည် မြန်မာပြည်သူပြည်သားများ ကြုံတွေ့နေရသည့် ပိုမိုနက်ရှိုင်းသည့် အားနည်းချက်များကို ပေါ်လွင်စေပြီး၊ ပိုမိုကျယ်ပြန့်လာသည့် အကျပ်အတည်းကို နိုင်ငံတကာမှ ဆက်လက် အာရုံစိုက်ရန် လိုအပ်ကြောင်း ထင်ရှားစေခဲ့ပါသည်။ လူသားချင်းစာနာမှုဆိုင်ရာ အကူအညီပေးရေးလုပ်ငန်းများအတွက် အဖက်ဖက်မှ အရေးတကြီး လမ်းဖွင့်ပေးရမည်ဖြစ်ပြီး၊ အကူအညီပေးရေး လုပ်သားများ ဘေးကင်းလုံခြုံစွာ လှုပ်ရှားဆောင်ရွက်နိုင်စေရပါမည်။ 

သဘာဝဘေးဒဏ်သင့်ခဲ့သည့် ဒေသများမှာ စစ်ရေးလုပ်ဆောင်မှုများ ဆက်လက်လုပ်ဆောင်နေခြင်းသည် နောက်ထပ် အသက်ဆုံးရှုံးမှုများ ရှိလာနိုင်သည့်အပြင် တုံ့ပြန်ဆောင်ရွက်ရေးများ လုပ်ဖို့ အရေးပါသည့် ပူးတွဲတာဝန်ကိုပါ ထိခိုက်စေနိုင်ပါသည်။

အထူးကိုယ်စားလှယ်အနေဖြင့် အကြမ်းဖက်မှု မည်သည့်ပုံစံကိုမဆို ရှုတ်ချပြီး၊ ပဋိပက္ခတွင်  ပါဝင်ပတ်သက်သူအားလုံးအနေဖြင့် စစ်မက်ပြုခြင်းများကို ချက်ချင်း ရပ်တန့်ရန်နှင့် အကူအညီပေးရေးလုပ်သားများအပါအဝင် အရပ်သားပြည်သူများကို ကာကွယ်စောင့်ရှောက်ရေးနှင့် အသက်ကယ်အကူအညီများပေးပို့ရေးတို့တွင်သာ ၎င်းတို့၏ အားထုတ်မှုများကို အာရုံစိုက်ပေးရန် တောင်းဆိုပါသည်။

မြန်မာနိုင်ငံ၏ အိမ်နီးချင်းနိုင်ငံများသို့ ပထမဆုံးအကြိမ် သွားရောက်တွေ့ဆုံသည့် အထူးကိုယ်စားလှယ်၏ခရီးစဉ်သည် အိန္ဒိယနိုင်ငံသို့ ပြီးခဲ့သည့် ရက်သတ္တပတ်က သွားရောက်ခဲ့သည့် ခရီးစဉ်တွင် ပြီးဆုံးခဲ့ပြီဖြစ်သည်။ အဆိုပါတွေ့ဆုံဆွေးနွေးမှုများတွင် ဒေသတွင်း စိုးရိမ်ပူပန်မှုများကို ဆွေးနွေးဖလှယ်ခဲ့သည့်အပြင် ဝင်ရောက်သွားလာခွင့်နှင့် အကူအညီများ ပံ့ပိုးနိုင်ရန် ပိုမိုကောင်းမွန်သည့် ညှိနှိုင်းဆောင်ရွက်မှုအတွက် အလားအလာများကို အလေးပေးဆွေးနွေးခဲ့သည်။

အထူးကိုယ်စားလှယ်သည် ငလျင်၏ အကျိုးဆက်များနှင့် နိုင်ငံရေး အကျပ်အတည်းကြောင့် ပိုမိုကျယ်ပြန့်လာနေသည့် ဒေသတွင်း သက်ရောက်မှုများအတွက် သဟဇာတရှိပြီး အားလုံးပါဝင်သော အခြေခံမူများနှင့်အညီ တုံ့ပြန်ဆောင်ရွက်မှုများကို ထောက်ခံအားပေးဖို့အတွက် မကြာမီ ဒေသတွင်းသို့ ပြန်လည်ရောက်ရှိလာမည် ဖြစ်ပါသည်။ သူမသည် အာဆီယံအထူးကိုယ်စားလှယ်နှင့်လည်း ဆက်လက်၍ အနီးကပ် ပူးပေါင်းဆောင်ရွက်သွားမည်ဖြစ်သည်။

အထူးကိုယ်စားလှယ်သည် ကုလသမဂ္ဂ၏ ဒေသတွင်းနှင့် ကမ္ဘာလုံးဆိုင်ရာ ကွန်ရက်တို့၏ ပံ့ပိုးမှုဖြင့် အိမ်နီးချင်းနိုင်ငံများ၊ တခြားနိုင်ငံများနှင့် ပူးပေါင်းဆောင်ရွက်နေသည့် မြန်မာနိုင်ငံရှိကုလသမဂ္ဂအဖွဲ့၊ အရေးပေါ်ကယ်ဆယ်ရေးဆိုင်ရာ ညှိနှိုင်းရေးမှူးတို့နှင့် ဆက်လက်၍ နီးကပ်စွာ ဆက်သွယ်ဆောင်ရွက်နေ ပါသည်။

မြန်မာနိုင်ငံ၏ အိမ်နီးချင်းနိုင်ငံများနှင့် အာဆီယံ၏ ယန္တရားများအပါအဝင် နိုင်ငံများစွာတို့မှ ချက်ချင်း ပံ့ပိုးကူညီမှုများ ပေးခဲ့ပါသည်။ အထူးကိုယ်စားလှယ်အနေနဲ့လည်း အဖွဲ့ဝင်နိုင်ငံများနှင့် အခြား အလှူရှင်များထံသို့ တုံ့ပြန်ဆောင်ရွက်မှုများ တိုးချဲ့လုပ်ဆောင်နိုင်ရေးအတွက် လိုအပ်သလို အသုံးပြုနိုင်သည့် ရန်ပုံငွေများ အလျင်အမြန် ထောက်ပံ့ပေးရန် တောင်းဆိုထားပါသည်။

နယ်မြေဒေသဆိုင်ရာ ထိန်းချုပ်မှုမရှိဘဲ နိုင်ငံတကာ လူသားချင်းစာနာမှုဆိုင်ရာ စံနှုန်းများနှင့်အညီ ရရှိနိုင်သည့် လမ်းကြောင်းများနှင့် ပါဝင်ပတ်သက်သူများမှတဆင့် ဘေးဒဏ်သင့် ပြည်သူများနှင့် ဒေသများဆီသို့ လုံခြုံစိတ်ချရပြီး အတားအဆီးမရှိ ဝင်ရောက်ခွင့် ရရှိရပါမည်။  ရောက်ရှိရန်ခက်ခဲသောနေရာများတွင် လှုပ်ရှားဆောင်ရွက်နေကြသည့် ရပ်ရွာအခြေပြု တုံ့ပြန်ဆောင်ရွက်နေသူများသည် ရှေ့လာမည့်နေ့ရက်များတွင် အရေးပါသည့်အခန်းကဏ္ဍမှ ပါဝင်လာမည်ဖြစ်ပါသည်။ ပြန်လည်သင့်မြတ်ရေးလမ်းကြောင်းတစ်ခုတွင် အကြမ်းဖက်မှု အဆုံးသတ်ရန် လိုအပ်ပြီး၊ ကုလသမဂ္ဂနှင့် မိတ်ဖက်အဖွဲ့အစည်းများအား လူသားချင်းစာနာမှုဆိုင်ရာ လိုအပ်ချက်များ အထူးသဖြင့် ထိခိုက်လွယ်ဆုံးနှင့် အမေ့လျော့ခံ ပြည်သူများကြား ဖြေရှင်းဆောင်ရွက်နိုင်ရန် ကန့်သတ်ချက်မရှိ ဝင်ရောက်ခွင့်လည်းလိုအပ်ပါသည်။