မြန်မာနိုင်ငံဆိုင်ရာ ကုလသမဂ္ဂဌာနေ ညှိနှိုင်းရေးမှူးနှင့် လူသားချင်းစာနာမှုဆိုင်ရာ ညှိနှိုင်းရေးမှူး (ယာယီ)၏ သတင်းထုတ်ပြန်ချက်

မတ်လ ၂၈ ရက်နေ့တွင် မြန်မာနိုင်ငံ၌  ရစ်ချ်တာစကေး ပြင်းအား ၇.၇ အဆင့်ရှိသည့် ငလျင်လှုပ်ခတ်ခဲ့မှုကြောင့် နေရာအနှံ့ ပျက်စီးဆုံးရှုံးမှု များစွာ ရှိခဲ့ပြီး ဒေသခံ ပြည်သူများအပေါ် ကြီးစွာသော သက်ရောက်မှုများ ရှိခဲ့ပါသည်။ 

မြန်မာနိုင်ငံဆိုင်ရာ ကုလသမဂ္ဂ ဌာနေညှိနှိုင်းရေးမှူးနှင့် လူသားချင်းစာနာမှုဆိုင်ရာ ညှိနှိုင်းရေးမှူး (ယာယီ) မစ္စတာ မာကိုလူဂျီ ကော်စီသည် လွန်စွာ ဝမ်းနည်းကြောင်းနှင့်  ဤကြေကွဲဖွယ် အချိန်ကာလတွင် မဆုတ်မနစ် မြန်မာပြည်သူများနှင့်အတူ ရှိနေကြောင်း ဖော်ပြပါသည်။ 

သတင်းအချက်အလက် အသစ်များ ထပ်မံရရှိပါက ထိခိုက်သေဆုံးသူ ဦးရေကို ထပ်မံ ဖော်ပြသွားမည် ဖြစ်သော်လည်း ကနဦးသတင်းများအရ သေဆုံးသူ ၇၀၀ ကျော်နှင့် ထိခိုက်ဒဏ်ရာရသူ ၁၆၀၀ ကျော် ရှိပြီး၊ သေဆုံးထိခိုက်ဒဏ်ရာရသူ အရေအတွက် ဆက်လက် မြင့်တက်လာဖွယ်ရှိပါသည်။ ကုလသမဂ္ဂနှင့် မိတ်ဖက်အဖွဲ့အစည်းများသည် အရေးပေါ် တုံ့ပြန်ဆောင်ရွက်မှုများကို ကူညီထောက်ပံ့ရန် အရေးပေါ် ဆော်သြစည်းရုံးနေပြီး မည်သည့်နေရာဒေသမှမဆို ငလျင်ဒဏ် သင့်ခဲ့သည့် လူမှုအဖွဲ့အစည်းများအားလုံးကို ကူညီထောက်ပံ့ရန် အသင့်ရှိနေပါသည်။

ဤငလျင်သည် မြန်မာနိုင်ငံအနေဖြင့် စိုးရိမ်ဖွယ်ရာ လူသားချင်းစာနာထောက်ထားရေး အကျပ်အတည်းများကြောင့် ယိမ်းယိုင်နေပြီးသော အချိန်တွင် လှုပ်ခတ်ခဲ့ခြင်းဖြစ်ပါသည်။ ထိုအကျပ်အတည်းများမှာ ရေရှည်ဖြစ်ပွားနေသော ပဋိပက္ခများနှင့် ထပ်တလဲလဲဖြစ်ပေါ်နေသော သဘာဝဘေးအန္တရာယ်များကြောင့် အဓိက ဖြစ်ပါသည်။ ဤကဲ့သို့ လွန်စွာ အရေးကြီးသည့်အချိန်တွင် မြန်မာနိုင်ငံသားများသည် နိုင်ငံတကာ အသိုင်းအဝန်း၏ ခိုင်မာသော ပံ့ပိုးမှုကို အရေးတကြီး လိုအပ်နေပါသည်။