ကုလသမဂ္ဂအတွင်းရေးမှူးချုပ်၏ ကမ္ဘာ့လူသားချင်းစာနာမှုဆိုင်ရာအထိမ်းအမှတ်နေ့ သတင်းစကား

ယခုနှစ် ကမ္ဘာ့လူသားချင်းစာနာထောက်ထားမှုဆိုင်ရာအထိမ်းအမှတ်နေ့ဟာ ဘဂ္ဂဒက်မြို့က ကနဲလ်ဟိုတယ်ကို ဗုံးခွဲတိုက်ခိုက်ခံရတဲ့ အနှစ် ၂၀ ပြည့် အောက်မေ့ဖွယ်နေ့ ဖြစ်ပါတယ်။ 

စိတ်ထိခိုက်ဝမ်းနည်းဖွယ်ရာ အဲဒီနေ့မှာ အထူးကိုယ်စားလှယ် Sergio Vieira de Mello အပါအဝင် ကျွန်တော်တို့ရဲ့ ကုလသမဂ္ဂဝန်ထမ်း ၂၂ ဦး ဆုံးရှုံးခဲ့ရပါတယ်။

အဲ့ဒီအဖြစ်ဆိုးဟာ လူသားချင်းစာနာထောက်ထားမှုအကူအညီပေးရေးလုပ်ငန်း ဆောင်ရွက်ရာမှာ အပြောင်းအလဲတစ်ခုကို မှတ်မှတ်ထင်ထင် ဖြစ်စေခဲ့ပါတယ်။

ဘာကြောင့်လဲဆိုတော့ ဒီနေ့ခေတ်အခါမှာ လူမှုကရုဏာလုပ်သားတွေကို ကမ္ဘာတဝန်းမှာ အသိအမှတ်ပြု လေးစားလာကြပေမယ့် သူတို့ကို ထိခိုက်နာကျင်အောင်လုပ်မယ့်သူတွေရဲ့ ပစ်မှတ်ထား ခံရမှုလည်း ကြုံလာရနိုင်ပါတယ်။

ဒီနှစ်မှာ ကမ္ဘာတစ်ဝန်းက နိုင်ငံပေါင်း ၆၉ နိုင်ငံက လူသန်းပေါင်း ၂၅၀ အတွက် လူမှုဘဝကယ်ဆယ်ရေး အကူအညီတွေပေးဖို့ လျာထားပါတယ်။ ဒါဟာ ကနဲလ်ဟိုတယ် ဗုံးခွဲတိုက်ခိုက်ခံရချိန်ကထက် ဆယ်ဆမက ပိုပြီး များပြားပါတယ်။

စိတ်မကောင်းစရာက ရန်ပုံငွေထည့်ဝင်မှု နည်းပါးလွန်းနေတာပါ။ အကျပ်အတည်းတွေ များပြားလာတာနဲ့အမျှ အကူအညီလိုအပ်နေတဲ့ လူသန်းပေါင်းများစွာအတွက် လူမှုကရုဏာလုပ်နေကြသူတွေအနေနဲ့ အကူအညီပေးတာတွေလျှော့ပစ်ဖို့ ဖိအားပေးခံနေရတာဟာ လက်မခံနိုင်စရာ ဖြစ်ပါတယ်။

အခက်အခဲအမျိုးမျိုးဟာ လွန်ခဲ့တဲ့အနှစ် ၂၀ ကာလအတွင်း ပို ပိုပြီး များလာပါတယ်။  

ပထဝီနိုင်ငံရေးအခြေအနေ တင်းမာမှုတွေ မြင့်တက်လာတယ်၊

နိုင်ငံတကာ လူသားချင်းစာနာမှုနဲ့ လူ့အခွင့်အရေး ဥပဒေတွေကို ပြောင်ပြောင်တင်းတင်း လျစ်လျူရှုလာတယ်၊

ရည်ရွယ်ချက်ရှိရှိ တိုက်ခိုက်တာတွေနဲ့ သတင်းတု သတင်းမှား ဖြန့်ဝေတဲ့ လှုပ်ရှားမှုတွေ လုပ်လာတယ်၊

အခုဆို လူလူချင်းစာနာမှုဝါဒကိုတောင် တိုက်ခိုက်လာကြတယ်။

ဒါပေမဲ့ ဒီအခက်အခဲတွေကြောင့် ကမ္ဘာ့လူသားချင်းစာနာမှုအသိုင်းအဝိုင်းကို ပိုပြီး အားကောင်းလာစေပါတယ်။

လူမှုကရုဏာလုပ်သားတွေဟာ များသောအားဖြင့် သက်ဆိုင်ရာနိုင်ငံအတွင်းက ဒေသခံဝန်ထမ်းတွေ ဖြစ်ကြပြီး သူတို့အကူအညီပေးနေသူတွေနဲ့ ပိုပြီး နီးစပ်ပါတယ်။

သူတို့ဟာ လူ့အသက်တွေကို ကယ်ဆယ်ဖို့နဲ့ ကာကွယ်ဖို့ဆိုတဲ့ တစ်ခုတည်းသော ရည်ရွယ်ချက်နဲ့ သဘာဝဘေးဒဏ်သင့်ဒေသတွေနဲ့ ပဋိပက္ခဖြစ်ရာဒေသတွေက ရှေ့တန်းနေရာတွေအထိ စွန့်စားသွားရောက်ပြီး အကူအညီပေးနိုင်မယ့် နည်းလမ်းအသစ်တွေကို ရှာဖွေနေကြပါတယ်။

ဒါကြောင့် ဒီကနေ့ကျရောက်တဲ့  ကမ္ဘာ့လူသားချင်းစာနာမှုဆိုင်ရာအထိမ်းအမှတ်နေ့မှာ နေရာအနှံ့အပြားက လူမှုကရုဏာလုပ်သားတွေရဲ့ ရဲစွမ်းသတ္တိနဲ့ စူးစိုက်လုပ်ဆောင်မှုတွေကို ဂုဏ်ပြုလိုက်ပါတယ်။

ကမ္ဘာတစ်ဝန်းမှာ သူတို့ရဲ့ အလျှော့မပေးတဲ့ ကယ်ဆယ်ရေး ကြိုးပမ်းဆောင်ရွက်မှုတွေကို အပြည့်အဝ အားပေးထောက်ခံကြောင်း ကျွန်တော်တို့ ထပ်လောင်း အတည်ပြုလိုက်ပါတယ်။

ဘယ်သူပဲဖြစ်ဖြစ်၊ ဘယ်နေရာပဲဖြစ်ဖြစ်၊ ဘာအတွက်ပဲဖြစ်ဖြစ်

လိုအပ်နေသူအားလုံးကို အကူအညီပေးတဲ့ သူတို့ရဲ့ မယိမ်းယိုင်တဲ့ စူးစိုက်လုပ်ဆောင်မှုတွေကို ကျွန်တော်တို့ ဂုဏ်ပြုပါတယ်။

ကျေးဇူးတင်ပါတယ်။