ကုလသမဂ္ဂအတွင်းရေးမှူးချုပ်၏ ကမ္ဘာ့ပတ်ဝန်းကျင်ထိန်းသိမ်းရေးနေ့ သတင်းစကား

(အလွတ်သဘော ဘာသာပြန်ဆိုချက်)

ဒီနှစ် ကမ္ဘာ့ပတ်ဝန်းကျင်ထိန်းသိမ်းရေးနေ့မှာ သတိပေးအချက်ပြမှုတွေ နေရာတိုင်းမှာ ရှိနေပြီဖြစ်ပါတယ်။

လွန်ခဲ့တဲ့ ၁၁ နှစ်ဟာ အပူဆုံးနှစ်တွေအဖြစ် မှတ်တမ်းဝင်ခဲ့ပါတယ်။

ပြီးတော့ ယိုယွင်းမှုတွေထဲမှာ အပူချိန်မြင့်တက်လာရုံတင်မကပါဘူး – လေထုညစ်ညမ်းတာကနေ မြေဆီလွှာပျက်စီးတာ၊ ဂေဟစနစ်တွေပျက်သုဉ်းတာနဲ့ ဇီဝမျိုးစုံမျိုးကွဲတွေ ပျောက်ကွယ်ကုန်တာအထိ ဖြစ်ပျက်နေတာပါ။

ဒါတွေဟာ ကျန်းမာရေးကို ထိခိုက်စေတယ်၊ အိုးအိမ်တွေကို ဖျက်ဆီးပစ်တယ်၊ ပြီးတော့ ငတ်မွတ်ခေါင်းပါးမှုကိုလည်း ပိုပြီးဆိုးရွားစေပါတယ်။

ကမ္ဘာကြီးမှာ ပျမ်းမျှသတ်မှတ်အပူချိန် ၁.၅ ဒီဂရီထက် ယာယီ မြင့်တက်လာဖို့ ဦးတည်နေပြီဖြစ်ပါတယ်။

အပူချိန် တစ်စိတ်စာလေး တက်လာတိုင်းမှာတောင် ပိုပြီးကြီးမားတဲ့ ထိခိုက်ပျက်စီးမှုတွေ သယ်ဆောင်လာတာပါ – အထူးသဖြင့် ထိခိုက်လွယ်ဆုံးသူတွေအတွက် စိုးရိမ်စရာအခြေအနေပါ။

ကျွန်တော်တို့ရဲ့ တာဝန်က အဲ့ဒီလို အပူချိန်လွန်ကဲမယ့် အခြေအနေကို အချိန်အတိုဆုံးနဲ့ ထိခိုက်မှုအနည်းဆုံးဖြစ်အောင် လုပ်ဖို့ပါ။ ဒါ့အပြင် အပူချိန်လွန်ကဲမှုကို အမြန်ဆုံး ပြန် လျှော့ချနိုင်ဖို့  ဖြစ်ပါတယ်။

ဒါက ဖန်လုံအိမ်ဓာတ်ငွေ့ ထုတ်လွှတ်မှုတွေကို အကြီးအကျယ် လျှော့ချရမှာကို ဆိုလိုတာပါ။

ရုပ်ကြွင်းလောင်စာတွေ သုံးတာကို ရပ်တန့်ပြီး ပြည့်ဖြိုးမြဲစွမ်းအင်တွေဆီ ကူးပြောင်းလာအောင် အရှိန်အဟုန်မြှင့် လုပ်ဆောင်ရပါမယ်။ ဒါဟာ ကုန်ကျစရိတ်တွေကို လျှော့ချဖို့နဲ့ စစ်မှန်တဲ့ စွမ်းအင်ဖူလုံမှု ရရှိဖို့အတွက် တစ်ခုတည်းသော ရေရှည်တည်တံ့မယ့် လမ်းစဉ် ဖြစ်ပါတယ်။

မီသိန်းဓာတ်ငွေ့ ထုတ်လွှတ်မှုကို လျှော့ချတာဟာ အချိန်တိုအတွင်း ကမ္ဘာကြီးပူနွေးလာမှုကို တားဆီးဖို့အတွက် အမြန်ဆုံးနဲ့ စရိတ်အသက်သာဆုံး နည်းလမ်းတွေထဲက တစ်ခု ဖြစ်ပါတယ်။

သစ်တောတွေ၊ မြေယာတွေနဲ့ ပင်လယ်သမုဒ္ဒရာတွေကို ကာကွယ်စောင့်ရှောက်ရပါမယ်။

ဆိုးရွားလှတဲ့ ရာသီဥတုရိုက်ခတ်မှုဒဏ်တွေကို ဒေသခံလူထုတွေ ရင်ဆိုင်ကျော်လွှားနိုင်အောင် ကူညီပေးရပါမယ်။

ဖွံ့ဖြိုးဆဲနိုင်ငံတွေအပေါ် ထားရှိတဲ့ ရာသီဥတုဆိုင်ရာ ဘဏ္ဍာရေးကတိကဝတ်တွေကို ဖြည့်ဆည်းပေးရမယ်။ ဒါမှသာ အသက်အိုးအိမ်တွေကို ကယ်တင်ဖို့၊ အသက်မွေးဝမ်းကျောင်းလုပ်ငန်းတွေကို ကာကွယ်ဖို့နဲ့ စီးပွားရေး မြှင့်တင်မှုတိုကို ပံ့ပိုးပေးနိုင်မှာပါ။

ကျွန်တော်တို့ရဲ့ ပတ်ဝန်းကျင်နဲ့ အနာဂတ်အတွက် လက်တွေ့ အကောင်အထည်ဖော်ရမယ့် အချိန်ကို ရောက်နေပါပြီ။