ကုလသမဂ္ဂအတွင်းရေးမှူးချုပ်၏ ကုလသမဂ္ဂနေ့ သတင်းစကား၊ ၂၀၂၂ ခုနှစ်၊ အောက်တိုဘာလ ၂၄ရက်။

ကုလသမဂ္ဂသည် မျှော်လင့်ချက်မှ ပေါက်ဖွားလာသော အဖွဲ့အစည်း ဖြစ်ပါသည်။

ဒုတိယကမ္ဘာစစ်နှောင်းပိုင်းတွင် မျှော်လင့်ချက်နှင့် ယုံကြည်ချက်တို့သည် ကမ္ဘာ့ပဋိပက္ခမှ ကမ္ဘာလုံး ဆိုင်ရာ ပူးပေါင်းဆောင်ရွက်မှုဆီသို့  ဦးတည်လာပါသည်။

ယနေ့ ကျွန်ုပ်တို့၏အဖွဲ့အစည်းသည် တစ်ကြိမ်တစ်ခါမှ မရှိ/မဖြစ်ခဲ့ဘူးသည့် စိန်ခေါ်မှုများဖြင့် ရင်ဆိုင် နေရပါသည်။

သို့ပင်ငြားလည်း ဤကဲ့သို့သော အခြေအနေမျိုးကိုကိုင်တွယ်ဖြေရှင်းရန် ကုလသမဂ္ဂကို ဖွဲ့စည်းခဲ့ရခြင်း ဖြစ်ပါသည်။

ယခုအခါတွင် ကျွန်ုပ်တို့သည် ကမ္ဘာ့နေရာအနှံ့အပြားတွင် ကုလသမဂ္ဂပဋိညာဉ်စာတမ်း၏ တန်ဖိုး ထားမှုများ နှင့် အခြေခံမူများကို ယခင်ထက် ပိုမိုအသက်ဝင်လာအောင် လုပ်ဆောင်ရန် လိုအပ် လာပါသည်။

ဘဝများ၊ အနာဂတ်များနှင့် ကမ္ဘာလုံးဆိုင်ရာ တိုးတက်မှုတို့ကို အနှောက်အယှက်ဖြစ်စေသော ပဋိပက္ခများကို အဆုံးသတ်စေပြီး ငြိမ်းချမ်းရေး ရရှိစေရန် အခွင့်အလမ်းဖွင့်ပေးခြင်းတို့ဖြင့် အကောင်အထည်ဖော်ရန် လိုအပ်ပါသည်။

အလွန်အမင်း ဆင်းရဲမွဲတေမှု အဆုံးသတ်ရေး၊ မညီမျှမှုများကို လျှော့ချရေးနှင့် စဉ်ဆက်မပြတ် ဖွံ့ဖြိုးတိုးတက်ရေး ရည်မှန်းချက်ပန်းတိုင်များကို ဖော်ဆောင်‌ရန်လိုအပ်ပါသည်။

ရုပ်ကြွင်းလောင်စာများအပေါ် စွဲလမ်းသုံးစွဲနေမှုကို ရပ်တန့်ပြီး၊ ပြန်လည်အသုံးပြုနိုင်သော စွမ်းအင် ကို သာ သုံးစွဲသည့် တော်လှန်ရေးကို အလျင်အမြန် စတင်ခြင်းဖြင့် ကျွန်ုပ်တို့၏ကမ္ဘာမြေကို အကာအကွယ် ပေးရန် လိုအပ်ပါသည်။

နောက်ဆုံးအနေဖြင့် အမျိုးသမီးများနှင့် မိန်းကလေးများအတွက် အခွင့်အလမ်းနှင့် လွတ်လပ်မှု ချိန်ခွင် ကို ဟန်ချက်ညီစေပြီး လူသားအားလုံးအတွက် လူ့အခွင့်အရေးကို သေချာစေရန်လိုအပ်ပါသည်။

ကုလသမဂ္ဂနေ့ အထိမ်းအမှတ် အခါသမယတွင် ကျွန်ုပ်တို့ တစ်ကမ္ဘာလုံး သွေးစည်းညီညွတ်စွာ တညီတညွတ်တည်း ပူးပေါင်းဆောင်ရွက်ကာ လူသားမျိုးနွယ်အနေဖြင့် ရရှိနိုင်မည့် အောင်မြင်မှုများကို ရည်စူးပြီး ကျွန်ုပ်တို့၏ မျှော်လင့်ချက်နှင့် ယုံကြည်ချက်တို့ကို အသစ်တစ်ဖန် ပြန်လည် တည်‌ဆောက်ကြပါစို့။