ကုလသမဂ္ဂအတွင်းရေးမှူးချုပ်၏ လိင်တူချင်း ချစ်ခြင်းနှင့် ဆန့်ကျင်ဖက်လိင်ကဲ့သို့ ပြုမူနေထိုင်ခြင်းများအား မုန်းတီးခြင်းကို ဆန့်ကျင်သော အပြည်ပြည်ဆိုင်ရာနေ့ သတင်းစကား

ဒီကနေ့ကျရောက်တဲ့ လိင်တူချစ်သူတွေ၊ ဆန့်ကျင်ဘက်လိင်ကဲ့သို့ ပြောင်းလဲခံယူပြုမူနေထိုင်သူတွေနဲ့ လိင်တူ လိင်ကွဲနှစ်မျိုးလုံးကို ချစ်ခင်နှစ်သက်စုံမက်သူတွေအပေါ် ရွံရှာမုန်းတီးမှုများကို ဆန့်ကျင်တဲ့ အပြည်ပြည်ဆိုင်ရာနေ့မှာ ရိုးရှင်းတဲ့ အမှန်တရားတစ်ခုကို အတည်ပြုပြောလိုပါတယ်။ အဲဒါကတော့ "ကိုယ့်ရဲ့ ပင်ကိုယ်သဘာဝအတိုင်း ဖြစ်တည်နေထိုင်ခြင်းဟာ ဘယ်တော့မှ ပြစ်မှုမမြောက်ဘူး"ဆိုတာပါပဲ။

ပြီးခဲ့တဲ့ ဆယ်စုနှစ်တွေအတွင်းမှာ LGBTIQ+ တွေရဲ့ တန်းတူညီမျှ အခွင့်အရေးတွေအတွက် သိသိသာသာ တိုးတက်ပြောင်းလဲမှုတွေ ရှိခဲ့ပါတယ်။

ဒါပေမဲ့ ကမ္ဘာတစ်ဝှမ်းမှာ သူတို့ရဲ့ လူ့အခွင့်အရေးတွေကို နောက်ပြန်ဆွဲဖို့ စနစ်တကျ ဝိုင်းဝန်းကြိုးပမ်းနေကြတာတွေကိုလည်း တွေ့နေရဆဲဖြစ်ပါတယ်။ လွတ်လပ်စွာ ထုတ်ဖော်ပြောဆိုခွင့်နဲ့ ငြိမ်းချမ်းစွာ စုဝေးခွင့်တွေကို ကန့်သတ်တာ၊ အမုန်းတရားတွေ လှုံ့ဆော်တာ၊ လူ့အခွင့်အရေး ကာကွယ်စောင့်ရှောက်သူတွေကို ပစ်မှတ်ထား တိုက်ခိုက်တာ၊ ပြီးတော့ မရှိမဖြစ်လိုအပ်တဲ့ ဝန်ဆောင်မှုတွေအတွက် ရန်ပုံငွေတွေကို ဖြတ်တောက်တာမျိုးတွေ လုပ်ဆောင်နေကြပါတယ်။ နှစ်ပေါင်းများစွာအတွင်း ပထမဆုံးအကြိမ်အဖြစ် နှစ်ဦးသဘောတူ လိင်တူဆက်ဆံတာကို ပြစ်မှုလို့ သတ်မှတ်တဲ့ နိုင်ငံအရေအတွက် တိုးလာနေပါတယ်။

အခွင့်အရေးတွေ တိုက်ခိုက်ခံရတဲ့အခါမျိုးမှာ  LGBTIQ+ တွေဟာ အမြဲလိုလို အရင်ဆုံး ထိခိုက်ခံစားကြရလေ့ ရှိပါတယ်။ သူတို့ဟာ တခြားသူတွေအစား ဒဏ်ခံရရုံတင်မကဘဲ သူတို့ရဲ့ ဘေးကင်းလုံခြုံရေး၊ ကျန်းမာရေးနဲ့ ဘဝရပ်တည်မှုတွေမှာပါ ပိုပြီးတော့ အန္တရာယ်ကြီးတဲ့ အခြေအနေတွေနဲ့ ရင်ဆိုင်နေကြရပါတယ်။

ဒီနှစ်ရဲ့ ဆောင်ပုဒ် ဖြစ်တဲ့ “ဒီမိုကရေစီရဲ့ နှလုံးသား” က လူတိုင်း ကြောက်ရွံ့မှုကင်းကင်းနဲ့ နေထိုင်ခွင့်ရှိရမယ်၊ လူ့အဖွဲ့အစည်းအတွင်းမှာလည်း တန်းတူညီမျှ ပါဝင်ခွင့်ရှိရမယ်ဆိုတာကို အားကောင်းတဲ့ သတိပေးချက်ဖြစ်ပါတယ်။

ကုလသမဂ္ဂအနေနဲ့ ဘယ်လိုခွဲခြားဆက်ဆံမှုမျိုးမှမရှိဘဲ လူသားတိုင်းရဲ့ မိသားစုဝင်အားလုံးနဲ့အတူ တစ်သားတည်း ရပ်တည်နေရတာကို ဂုဏ်ယူပါတယ်။ လူတိုင်းအတွက် ဘေးကင်းလုံခြုံမှု၊ ဂုဏ်သိက္ခာနဲ့ တန်းတူညီမျှမှုကို အတူ ရွေးချယ်ကြရအောင်ပါ။