ကုလသမဂ္ဂ အတွင်းရေးမှူးချုပ်၏ ကုလသမဂ္ဂနေ့ သတင်းစကား

(အလွတ်သဘော ဘာသာပြန်ဆိုချက်)

“ကျွန်ုပ်တို့ ကုလသမဂ္ဂအဖွဲ့၏ ကမ္ဘာသူကမ္ဘာသားအပေါင်းတို့သည်......”

ဒီစကားရပ်တွေဟာ ကုလသမဂ္ဂ ပဋိညာဉ်စာတမ်းရဲ့ အဖွင့်စကားဖြစ်ရုံသာမကဘဲ ကျွန်တော်တို့တတွေဟာ ဘယ်သူတွေဖြစ်တယ်ဆိုတာကို ဖွင့်ဆိုထားတာပါ။

ကုလသမဂ္ဂဆိုတာ အဖွဲ့အစည်းတစ်ခုဆိုတာထက် ပိုပါတယ်။ နယ်နမိတ်တွေကို ဖြတ်ကျော်ပြီး ကမ္ဘာ့တိုက်ကြီးတွေကို ပေါင်းကူးပေးကာ မျိုးဆက်တွေကို စေ့ဆော်ပေးနေတဲ့ ရှင်သန်နေတဲ့ ကတိတစ်ခုဖြစ်ပါတယ်။

နှစ်ပေါင်း ရှစ်ဆယ်တာကာလအတွင်း ငြိမ်းချမ်းရေးကို တည်ဆောက်ဖို့၊ ဆင်းရဲမွဲတေမှုနဲ့ ငတ်မွတ်ခေါင်းပါးမှုတွေကို ဖြေရှင်းဖို့၊ လူ့အခွင့်အရေးကို မြှင့်တင်ဖို့နဲ့ ပိုမို ရေရှည်တည်တံ့တဲ့ ကမ္ဘာကြီးတစ်ခုကို ဖန်တီးဖို့ အတူတကွ လုပ်ဆောင်ခဲ့ကြပါတယ်။

ရှေ့ကို မျှော်ကြည့်မယ်ဆိုရင် ပြင်းထန်လာနေတဲ့ ပဋိပက္ခတွေ၊ ရာသီဥတု ဖောက်ပြန်မှုတွေ၊ ထိန်းမနိုင် သိမ်းမရ နည်းပညာတွေနဲ့ ကျွန်တော်တို့ အဖွဲ့ကြီးရဲ့  အခြေခံအုတ်မြစ်ကို ခြိမ်းခြောက်နေမှုတွေ စတဲ့ ကြီးထွားလာနေတဲ့ စိန်ခေါ်မှုတွေကို ရင်ဆိုင်ရပါမယ်။

တွန့်ဆုတ်နေဖို့ ဒါမှမဟုတ် နောက်ဆုတ်ဖို့ အချိန်မဟုတ်ပါဘူး။

အခုအချိန်အခါက ပိုလို့ပင် ဘယ်နိုင်ငံကမှ မိမိဖာသာ မဖြေရှင်းနိုင်တဲ့ ပြဿနာတွေကို စုပေါင်းဖြေရှင်းဖို့ ကမ္ဘာကြီးက ထပ်မံ ကတိကဝတ်ပြုကြရမဲ့ အချိန် ဖြစ်ပါတယ်။

ယနေ့ကျရောက်တဲ့ ကုလသမဂ္ဂနေ့မှာ အားလုံးရဲ့ ကုလသမဂ္ဂအဖွဲ့ကြီးရဲ့ ထူးခြားတဲ့ ကတိကဝတ်ကို အတူတကွ ရပ်တည်ကာ အကောင်အထည်ဖော်ကြရအောင်ပါ။

“ကျွန်ုပ်တို့ ကမ္ဘာသူ ကမ္ဘာသားအပေါင်းတို့” တစုတစည်းတည်း လုပ်ဆောင်ဖို့ ရွေးချယ်တဲ့အခါ ဘယ်အရာတွေ ဖြစ်နိုင်သလဲဆိုတာ ကမ္ဘာကို ပြကြရအောင်ပါ။