ကုလသမဂ္ဂ အတွင်းရေးမှူးချုပ်၏ မြန်မာ ငလျင် အခြေအနေဆိုင်ရာ သတင်းထုတ်ပြန်ချက်

အရှေ့တောင် အာရှတွင် ပြီးခဲ့သည့် သီတင်းပတ်က လှုပ်ခတ်ခဲ့သော ငလျင်သည် ထိုင်းနိုင်ငံနှင့် တခြားနေရာများအပါအဝင် ဒေသတွင်းမှာ ပြင်းပြင်းထန်ထန် သက်ရောက်မှု ရှိခဲ့ပါသည်။ 

သို့သော် အထူးသဖြင့် မြန်မာနိုင်ငံသည် ငလျင်ဗဟိုချက်နေရာ ဖြစ်ခဲ့ပါသည်။ 

မြန်မာနိုင်ငံသည် ဆိုးရွားသည့် အပျက်အစီးများနှင့် ကူကယ်ရာမဲ့နေသည့် အရိပ်အယောင်တွေ ဒီကနေ့မှာ တွေ့ရပါသည်။ 

သေဆုံးသူဦးရေသည်လည်း လက်ရှိအချိန်တွင် ၃၀၀၀ ကျော်သွားပြီး ဆက်လက် မြင့်တက်နေပါသည်။ လူပေါင်း ထောင်ချီ ထိခိုက်ဒဏ်ရာရခဲ့သလို အုတ်ကျိုးအုတ်ပဲ့တွေအောက်မှာ လူအများအပြားလည်း ပိတ်မိနေပါသည်။

ဤကပ်ဘေးသည် နိုင်ငံတဝန်းတွင် ပြည်သူများ ရင်ဆိုင်နေရသည့် ပိုမိုနက်ရှိုင်းသည့် အားနည်းချက်များကို ဖွင့်ဟပြလိုက်တာ ဖြစ်ပါသည်။ 

ငလျင်မလှုပ်ခင်ကတည်းကတောင် မြန်မာနိုင်ငံသည် နိုင်ငံရေး၊ လူ့အခွင့်အရေးနှင့် လူသားချင်းစာနာထောက်ထားမှု အကျပ်အတည်းများကြောင့် ဒုက္ခပင်လယ်ဝေနေပြီး၊ လူအများအပြားကို ထိခိုက်စေကာ အိမ်နီးချင်းနိုင်ငံများ အပေါ်၌သာမက တခြားဒေသတွေအထိပါ ကျယ်ကျယ်ပြန့်ပြန့်ကူးစက်ပြီး နိုင်ငံဖြတ်ကျော်မှုခင်းများလည်း ပေါ်ပေါက်လာပါသည်။ 

လူသန်းပေါင်း ၂၀ နီးပါး ဒါမှမဟုတ် မြန်မာနိုင်ငံလူဦးရေ၏ သုံးပုံတပုံသည် လူသားချင်းစာနာထောက်ထားရေး အကူအညီများ လိုအပ်နေခဲ့ပြီး ဖြစ်ပါသည်။ 

ပဋိပက္ခနှင့် အကြမ်းဖက်မှုများကြောင့် လူသန်းနဲ့ချီ သူတို့၏ နေအိမ်တွေကနေ စွန့်ခွာထွက်ပြေးခဲ့ကြပြီးလည်း ဖြစ်ပါသည်။ 

မုတ်သုံရာသီလည်း ရောက်တော့မည်အချိန်တွင် ငလျင်သည် ဤဒုက္ခဆင်းရဲများကို ပိုမို ဆိုးရွားစေခဲ့ပါသည်။ 

ကျွန်ုပ်တို့အနေဖြင့် ရှေ့ဆုံးကနေ အရေးပေါ် ဆောင်ရွက်ချက်များ လုပ်ဆောင်ဖို့ လိုအပ်ပါသည်။ 

သို့ဖြစ်ပါ၍ အရေးပေါ် ကူညီကယ်ဆယ်ရေးဆိုင်ရာ ပေါင်းစပ်ညှိနှိုင်းရေးမှူး Tom Fletcher ကို ကျွန်ုပ် မြန်မာနိုင်ငံသို့ စေလွှတ်လိုက်ကြောင်း ယနေ့အသိပေးလိုပါသည်။ သူသည် မြေပြင်ကို မနက်ဖြန်မှာ ရောက်ပါလိမ့်မည်။

နောက်ပြီး ကျွန်ုပ်၏ မြန်မာနိုင်ငံဆိုင်ရာ အထူးကိုယ်စားလှယ် Julie Bishop ကိုလည်း ငြိမ်းချမ်းရေးနှင့် တွေ့ဆုံဆွေးနွေးမှု လမ်းကြောင်းများဆီသို့ သွားရောက်သည့် ကျွန်ုပ်တို့၏ ကတိကဝတ်များ ပိုမိုခိုင်မာအားကောင်းလာစေဖို့ လာမယ့်ရက်ပိုင်းတွေအတွင်းမှာ မြန်မာနိုင်ငံကို သွားရောက်ရန် စေလွှတ်ထားပါသည်။ 

အထူးသဖြင့် ဤအကျပ်အတည်း အတိုင်းအတာနှင့် ကိုက်ညီသည့် လွန်စွာအရေးတကြီး လိုအပ်နေသည့်ရန်ပုံငွေများကို နိုင်ငံတကာအသိုင်းအဝန်းအနေဖြင့် ချက်ချင်း တိုးမြှင့်ပေးကြရန် ကျွန်ုပ် မေတ္တာရပ်ခံပါသည်။

နိုင်ငံတဝန်း အကူအညီအလိုအပ်ဆုံးသူတွေထံသို့ ရောက်ရှိရန် မြန်ဆန် ဘေးကင်းပြီး ရေရှည်တည်တံ့ခိုင်မြဲကာ အတားအဆီးမရှိသည့် လူသားချင်းစာနာမှုဆိုင်ရာ ဝင်ရောက်ခွင့်များ ရရှိစေရန်ကိုလည်း ကျွန်ုပ် တောင်းဆိုပါသည်။ 

နောက်ပြီး ဤကဲ့သို့ စိတ်ထိခိုက်ဝမ်းနည်းဖွယ် အခိုက်အတန့်ကို မြန်မာပြည်သူ ပြည်သားများအတွက် အခွင့်အရေးတခု အဖြစ် ပြောင်းလဲနိုင်ရန် ဘက်ပေါင်းစုံက ကြိုးစားအားထုတ်ကြဖို့ကိုလည်း ကျွန်ုပ် တောင်းဆိုပါသည်။

ယာယီအပစ်ခတ် ရပ်စဲရေး ကြေညာချက်များကိုလည်း ကျွန်ုပ် ကြိုဆိုပါသည်။ 

ဤအချက်သည် အကူအညီများ စီးဆင်းရန်နှင့် ကယ်ဆယ်ရေးသမားများ သူတို့အလုပ် သူတို့ လုပ်နိုင်ရန်အတွက်လည်း အရေးပါလှပါသည်။

သို့သော် စစ်ပွဲတခု အဆုံးသတ်ခြင်းသည် အရေးကြီးသည့် နိုင်ငံရေး စကားဝိုင်းတခုကို အစပျိုးရန်နှင့် နိုင်ငံရေး အကျဥ်းသားများကို လွှတ်ပေးရန် မြန်မြန်ဆန်ဆန် လုပ်ဆောင်ရပါမည်။ 

အထူးသဖြင့် မြန်မာပြည်သူ ပြည်သားများအားလုံးကို ကိုယ်စားပြုသည်လို့ ခံစားရသည့် အားလုံးပါဝင်သည့် နိုင်ငံရေးလုပ်ငန်းစဥ် တခုဆီသို့ ဦးတည်ရပါမည်။ 

မြန်မာနိုင်ငံတဝန်း လူမှုအသိုင်းအဝိုင်းတွေအားလုံး တညီတညွတ်တည်း ပူဆွေးသောက ရောက်နေကြသလို ရက်စက်ကြမ်းကြုတ်သည့် ပဋိပက္ခများ အဆုံးသတ်ရန် နိုင်ငံရေးဖြေရှင်းနည်းတခု နောက်မှာ အားလုံး ညီညွတ်ကြဖို့ အချိန်တန်ပါပြီ။ 

ဤဖြေရှင်းချက်တွင် ဘင်္ဂလားဒေ့ရှ်နိုင်ငံမှ ရိုဟင်ဂျာများ ဘေးကင်းလုံခြုံပြီး မိမိဆန္ဒအလျောက် ဂုဏ်သိက္ခာရှိရှိ ရေရှည်ပြန်လာနိုင်ဖို့အတွက် လမ်းကြောင်းတခုလည်း ပါဝင်ရပါမည်။ ကျွန်ုပ်လည်း ပြီးခဲ့သည့်လက ကော့ဇက်ဘဇားတွင် ရှိသည့် ရိုဟင်ဂျာများထံသို့ သွားရောက်တွေ့ဆုံခွင့် ရခဲ့ပါသည်။ 

ဤဖြေရှင်းနည်းသည် နိုင်ငံတဝန်း ပေါ်ပေါက်နေသည့် အကြမ်းဖက်မှုနှင့် လူ့အခွင့်အရေး ချိုးဖောက်မှုများကို အဆုံးသတ်ရန်နှင့် ဒီမိုကရေစီစနစ် အမြစ်တွယ်ရန် လမ်းကြောင်းတခုလည်း ပါဝင်ရပါမည်။ 

လက်ရှိအချိန်သည် ကာလရှည်ကြာ ဆင်းရဲဒုက္ခ ခံစားနေရသည့် မြန်မာပြည်သူများနှင့် တသားတည်း ရပ်တည်ရမည့် အချိန်လည်း ဖြစ်ပါသည်။ 

သို့ဖြစ်ပါသောကြောင့် ကုလသမဂ္ဂအနေဖြင့် အကူအညီများ လိုအပ်ချိန်တွင် မြန်မာပြည်သူများအတွက် ငြိမ်းချမ်းရေးနှင့် အသက်ကယ်ဆယ်ရေး အကူအညီအထောက်အပံ့များအတွက် ဆက်လက်တွန်းအားပေးလုပ်ဆောင်သွားပါမည်။ 

ကျေးဇူးတင်ပါသည်။